Editorial Aanka By B.H Van Or
The Hakha Post careltu vialte “KUM THAR THLUACHUAHNAK” nan cung ah um ko seh” tiin The Hakha Post nih nan kut kan in tlaih hna.
Kum 2021 kum thar chung ah Pathian lam hruainak in kan hung lut than kho i, The Hakha Post careltu mizapi nanmah he, lo hma thar nan kan domhpi than lai i kum dongh tiang lo- hma nan kan chuahpi than lai ca ah kan hna a ngam.
Israel miphun hi caan saupi uktu bawi an ngeih lo ca ah Pathian sin ah uktu ding bawi kha an hal tik ah, Pathian nih hi tin a leh hna. Benjamin phun i mirum ngai a si mi ‘Kish’ Saul i a pa Laa cu an tlau. A fapa Saul kha laa a tlau mi kawl cu a fial. Saul le a sin um pa nih an Laa tlau an kawlnak ah tlang li an tawl nain an hmu lo. Saul nih a sin um pa kha, “Ra, kir cang usih, kapa nih khan Laa kong kha ruat ti loin, keimah kong tu ah lungrethei in a um sual lai” tiah a ti.
A sinum pa nih a thawh i “Zohhmanh hi khuachung ah Pathian mi pakhat a um i, an hmaizah ngai mi a si. A chimmi vialte kha a tling dih ko. Va kal usih ; “Kan pawh hnawh mi khual tlawnnak kong hi a hei kan chimh khawh ko hnga dah kaw” a ti. Saul nih na bia a tha, ra, kal usih” tiin an kal. Khuachung mi kha Hmutu kha a um maw? tiah an hal hna i an chimh hna.Profet kha Hmutu an rak ti hna. Profet Samuel sin ah Pathian nih “Thaizing ah Benjamin peng mipa pakhat ka rak thlah lai i ka mi Israel mi hna bawi si awk ah chiti na thuh lai” tiah a ti. An i ton hnu ah “na laa ni thum a tlau cang mi cu ruat len ti hlah, an hmuh cang. Israel miphun lak i duh awk thil vialte cu nangmah le na pa chungkhar vialte ca ah an si lo maw? tiah Samuel nih a ti. “Keimah cu Israel phun lak ah a hme bik Benjamin phun ka si lo maw? Ka chung le zong Benjamin phun vialte lak ah a nauta bik an si lo maw?” tiah Saul nih a leh.
A thaizing zingka te ah Samuel nih, “Tho tuah ka hei in thlah lai” tiin, khua pawngri an kal lio ah, “Na sinum kha kan lonh seh, nang cu hika hin tlawm tein um ta rih, Pathian bia cu kan hngalhter lai” a ti. Samuel nih Saul cu Israel mi uktu bawi si ding in chiti kha a lu ah a thuh. An tlun pah i minung pa hnih an ton mi hna nih “Nan kawl mi Laa cu an hmuh cang hna. Atu cu na pa nih Laa kong nakin nangmah tu kha an ruat cang” tiah an chimh. Cu tin Saul cu Israel miphun uktu bawi hmasa bik a hung si.
Saul le a sinum pa nih Laa a tlau mi kawl awk ah an pawh hnawh mi khual lam bantuk in kum 2021 kan khual lam cio ah, hnabei donghnak, vansan lilen le tahnak, thih le lohnak, zatlak puicimhnak, tong kho kan si dih. Kan i tinh mi hmu kho loin hnulei kir zai kan rel tik ah, hmailei kan si ding ning le kan zeizong vialte a kan “HMUTU” Bawipa kan Pathian sin tu ah toidornak le, midang ruahnak zong kha lain kan si ding ning a kan chim khotu Amah kha fuh deuh u sih law lam a kan hmuhsak ning tu in “KAN PAWH HNAWH MI KUM 2021 KUM THAR KHUAL LAM” hi kal i zuam cio hna usih…
