MISS in Chin miphun min cawisang chin hna usih
Nihin Chin miphun nih kan herh bik mi pakhat in chuahpi tiah ka ti hna sehlaw, “Chin ti mi hi fakpi in dirpi hna usihlaw hi ah hin i fun dih hna usih,” ka ti hnga.
Zeicatiah nihin Chin miphun hi vawlei pi ah kan i thek chin lengmang tik ah mah le khua mah le pengtlaang deuh in kan i sua, kan i hlam i kan funtom hna tikah Chin miphun min huap cawlcanghnak a der chin lengmang. Cucaah Cozah, biaknak, ramkheel, zatlaang phu, zungmawi (art), sianghleirun, thanchonak le a dang zaanglek lei ti bantuk ah Chin miphun huap cawlcanghnak hi tha kan pek deuh a herh. A bik in thangthar mino hna nih biatak tein kan dirpi a hau cang.
Hi rian ah The Hakha Post zong nih 2017 in Miss The Hakha Post ti in Chin miphun dihlak huap in Lengdawh (Miss) thimnak kan tuah ve. Hi Miss kan tuahnak ah kan i tinh mi cu: Kan Chin miphun chung in lengdawh kan ngeih mi hna cawisan lawng si lo in Chin miphun huap in kan mit kan auti, kan kut kan samhti nakding rian pakhat chuahpi hi a si. Cu pin ah The Hakha Post Awards zong 2017 thawk in 2016 kum chung ca ah phun sarih kan rak pek. Kum khat dan in pek a si i, a voi hnihnak cu 2018 kum dih lai ah kan pek than te lai.
Ni kum The Hakha Post Awards kan thimnak ah siseh, tukum Miss The Hakha Post kan thimnak ah siseh lunghmuih awk ngai in a lang mi cu vawlei pi um Chin miphun dihlak nih mah peng le tlang nakin Chin miphun min biapi chia in le lungtho tein kan i telnak fiang tein a lang. Hi nih hin hmunkip um Chin miphun kan i pehtlaihnak a fehter chinchin lai, kan i dawtnak a karhter chin lai i hmailei Chin miphun huap in riantuannak ah tlakrawh pakhat le thetse dip khat bantuk a si lai tiah ruahchannak kan ngei. Hmailei zong ah atu bantuk in ramchung ramleng um Chinmi vialte Chinmi huap cawlcanghnak ah lungtho tein thazaang chuah chin lengmang ko hna usih.
Tukum Miss The Hakha Post 2018 a kan hmuhpiak mi Hakha in Miss Genevieve Van Iang Mawi (No.6) siseh, 1st Runner-up Falam in a kan hmuhpiak mi Miss Cung Cer Cin (No.4), 2nd Runner-up Matupi in a kan hmuhpiak mi Miss Shwe Hle Sung (No.1) hna nan cung ah The Hakha Post nih kan in lawmhpi hna. A dang a hmu lo mi vialte zong The Hakha Post le Chin miphun aiawh in lungtho tein nan kan telpinak cung ah lunglawmhnak roca kan tial. ###
