Kum fatin Cozah cin mi thingkung an nung maw?
Kum fatin June thla a hung chuah poh cun Chin ramkulh cozah hruainak in thingkung an kan cinpi tawn. Cozah zung kip lawng si lo in khuami zatlaang phu le biaknak tiang zong nih mahle rian cio ah i chiah in cin tawn a si. Hihi kum fatin in tukum tiang cin a si.
Nizan June 19 zong ah Chin cozah hruainak in Hakha Golf tuknak hmun ah thingkung 4000 leng an cin. Hi kung 4000 hi chokhlei deuh lawngte an si. An zapi an nun dih lo hmanh ah zahceo hi nung hna sehlaw Hakha Golf tuknak hmun ah chokhlei kung thonghnih an paar ahcun Hakha Golf tuknak hmun cu aa dawhtuk hnga.
Kum fatin Chin cozah hruainak in Hakha khua ah phaizawng kung, faar kung, vaurawng, chokhlei le a dang thingkung phunphun an cin mi hi phun khat ah kung 4000 in tuak usihlaw a tlawm bik kung 30000 leng a si hnga i Ralkap uk chan chim lo, Democracy chuah hnu kum chung hmanh ah hin kung 300,000 leng a si cang hnga i an i dawh tuk cang hnga.
Asinain cu hlan vialte i an cin mi vialte kha an nung maw? An him maw? An theipaar hmuh mi an um maw? ti hi ruah awk ngai an si. Kum fatin ‘cuka hmun ah cu bantuk thingkung cuzat kan cin’ tiah media in zapi sin ah thanh a si tawn nain nihin ah hika hin Chin cozah nih thingkung pangpar a rak cin ti in hmuh awk an har ngai.
Kum fatin Chin cozah hruainak in thingkung cinnak ah media rian in kan telpi tawn hna. Khur khuarpiak cia mi ah bawi nih thlaikheo an van phun, vawlei an van chilh i ti an van toih. Cuti cun zapi i tlaih cio mi thlaikheo kha cin cio a si. Cu lio cu media nih bawh in hman thlak i chuah a si tawn.
Cuti hmaan i thlak dih cun tlun taak a si tawn i, a biapi bik mi kulhkharnak aa tel tawn lo. A kulhnak le a cinnak ah tangka cuzat an pek hna ti theih a um tawn lo. Cuti cun ‘Mimte (va) fa thlau in’ an ti bang kum fatin Chin cozah hruainak in hmun kip ah pangpar le thingkung dawhdawh tampi cin a si tawn ko nain nihin ah an theipar hmuh mi a tlawm ngaingai ko. Cucaah Chin cozah nih kum fatin thingkung le pangpar tampi an kan cinpiak tawn mi hi a cinnak lawng si lo in a kulhkharnak le a thlawhtuan pehzulh rian umchih peng tawn sehlaw cuti cun kan khua le kan ram cu kum fatin aa dawh chinchin ko hnga. ###
