Paletwa Peng, Miza le Watkuwah khua in Paletwa khuapi ah sii-inn i piah ding le thlahlawh chuah ah a kal mi hna i an i cit mi tilawng cu Rakhine hriamtlai phu AA nih an kham hna i, an kirter than hna tiah thawng kan theih.
Tilawng hi a dihlak ah pakua an si i, Kaladan tivapi in Paletwa lei an kal cuahmah lioah AA nih a kham hna. Cheukhat tilawng cu Paletwa lei ah an lan kho mi zong an um nain a cheu cu an ratnak lei ah an kirter than hna tiah khuami hna sin in thawng kan theih.
Khuami pakhat nih, “Tilawng hi pakua a si. An kham hna nak zong hi a hmun aa khat lo. Acheu cu Cuitaung khua ah an kham hna. Acheu cu an kirter than hna i suimilaam 6:00 hrawng ah tluang tein khua a phan than mi zong an um ve. Cun, an khualam a hlat ca ah a kir than kho lomi hna cu aa naihnak khua ah an riak hna,” tiah The Hakha Post ah a chim.
A kham cu an kham hna nain, AA lei nih harnak cu an pe hna lo, cun an thilri zong an chut hna lo tiah theih a si. Nihin tiang ah harnak a tong mi Paletwa Peng chung ah ralzaam hi khuate ah minung 20,000 in 60,000 kar, khuapi chung ah a zaam mi minung 18,000 leeng an um tiah theih a si.
