Miss Ethnic Myanmar a voi khatnak lengdawh zuamnak ah Chin miphun ai-awh in Hniang Hlei Sung (Hakha), Sabina Lal Rem Ruat (Falam) le Margaret (Matupi) hna an i zuam kho, tiah kan theih.
Aa zuam mi ah hin Falam in Sabina Lal Rem Ruat nih pathumnak (2nd Runner-up) a hmuh. Matupi in Margaret nih The Best Talent Award (lemcan thiam bik) laksawng a hmuh. Hakha in Hniang Hlei Sung cu laksawng ngaingai a hmu lo nain minung 41 chung top 10 thim mi ah aa tel kho.
“Pathian le Chinmi dawtu hna nanmah thazaang peknak thawng in pathumnak laksawng ka hmuh khawh mi a si. Lam a um ahcun hmailei zong ah kaa zuam than te ko lai. Thazaang ka pe rih ko u, tiah kan nawl hna. Kei hi Falam ka si. English for Professional Purposes final ka cawn lio a si. Chinmi hi Myanmar rampum huap in zeilei poh ah minthang ah aa chuah kho mi lawngte kan si ko. Ralthat a hau, zeihmanh tih ding a um lo. Zei kan tuah mi poh ah i biatak tu hi a biapi mi a si,” tiah Sabina nih The Hakha Post ah aa lawmhnak a chim.
“Timhtuahnak ah caan kan pek khawh mi a tlawm tuk. Hi bantuk Miss lei hi ka rak thiam mi a si ve lo tik ah kan chambaunak a tam ngaingai. Hawi sining zong kan tluk kho lo. Chinmi hi muidawh lei ah siseh, zei dangdang zong ah zahpi ding kan um ti lo. Amah belte, zei kan tuah mi hmanh hi timhtuahnak tampi ngeih a herh hi tutan zuamnak in kaa fiang i, ahopoh zong timhtuah a herh zia hi hngalhter kan duh ve hna. Kei hi top 20 tiang lawng ka phan nain Pathian le hawikom hna thazaang peknak thawng in lemcan thiam bik laksawng ka hmuh. Kan i zuam hlan ah hin an kan hneksak cio. Cheukhat cu hlasak, laam tibantuk in an hneksak hna. Kei hi lemcan in an ka hneksak i a thiam bik ah an ka thim ve. Atulio hi cu ka um sawh ko. B.Sc in degree ka la cang,” tiah Margaret nih The Hakha Post ah a chim.
Hi zuamnak kong he pehtlai in Hniang Hlei Sung nih, “Kei hi laksawng cu ka hmu lo nain Pathian le hawikom dawtu hna nih thazaang nan ka peknak le nan ka dirkamhnak thawng in minung 41 lak ah top 10 tiang ka phan kho ve. MEM hi an thim ning aa dang ngai. Top 10 in top 5 tiang thim than tibantuk a um lo. Top 10 chung ah winner, 1st runner-up le 2nd runner-up tiin an thim colh. Chinmi hi a zeilei hmanh ah Myanmar rampum a huap khotu kan si ve ko ti hi ka hun hngalh chin lengmang. Midang kan hawile zong nih zeihmanh tih lo tein i zuam cio ding zong saduh ka thahpiak hna. Atu hi Yangon Dagon University ah International Relations final ka cawn lio a si,” tiah The Hakha Post ah a chim.
Hi zuamnak hi Tlangcungmi Company ngei pawl nih a voikhatnak an tuah a si. Tlangcungmi lengdawh kha thim in mahle miphun ai-awhtu 41 an i zuam kho. Pakhatnak ah Kachin miphun M Ja Seng nih a hmuh. Pahnihnak Kaya miphun Ann Grace le pathumnak ah Sabina Lam Rem Ruat (Falam) nih laksawng an hmuh.
