Myanmar Universe Academy Pageant Production Miss zuamnak ah teinak hmutu Mai Zing Dawt Cer cu Myanmar ram ai-awh in Malaysia Sabah khua i tuah ding mi Global Man and Woman Pageant 2019 zuamnak ah December 1-7 tiang aa zuam lai, tiah kan theih.
Hi zuamnak hi Miss, Mister le MRS ti mi nutung pawl zuamnak a si lai. Miss Crystal Angel International Myanmar hruainak in Malaysia ah zuam i timh a si. Aa zuam ding mi hna hi Asia ramchung in Miss an si lai, tiah kan theih.
“Nihin tiang tha a ka petu dihlak cung ah kaa lawm tuk. Hmailei zong ah ka dirkamh peng rih u, ti nawl kan duh hna. Online zong in vote nan ka pek rih naklai zong kan nawl fawn hna. Hi zuamnak hi keimah tlinh ruang ah si loin ka zuam phun a si ca ah kaa zuam mi a si. A har tuk, tangka thazaang a herh, zuam taktak a herh. Harnak phunphun tei khawh a herh. Cawnnak zong a biapi ngai. Theihtlei tampi theihhngalh zong a hau. Cun, 3B ti mi Beauty, Brain le Body hi biapi in an zoh mi a si tik ah a fawi lo ngai mi a si. Atu hoi cu Malaysia in laksawng pakhat tal i tlunpi lo sual ding kha tawlreltu nih an phang tuk i a fawi lo ngai mi thil a si. Hihi ka zuam tuk mi a si nain, hmailei pawcawmnak tiang ca in pehzulh ding ka ruat lem lo,” tiah The Hakha Post ah a chim.
Mai Zing Dawt Cer cu Myanmar Universe Academy Pageant Production ah Winner, Best Style, Popular Choice Award, le National Costume laksawng a hmu mi a si. Aa zuam mi minung 60 leng ah Miss Crystal Angel International Myanmar nih Myanmar ram ai-awhtu ding ah an thim i Malaysia ah zuamnak ah a kal te lai, tiah kan theih.
Photos: Miss Global Woman Myanmar Facebook Page
