Myanmar Idol Season 3 hlasakthiam zuamnak ah Chinnu, Hakha in Ni Len Par Mawi aa zuam i top 8 tiang a phan cang.
“Kan i zuamka ah hin minung 10,000 hrawng kan si. Biakhiaktu (Judge) nih an hun kan rilh i atu hi minung 8 kan taang. Zarh khat ah minung pakhat lengmang kha tlak a si. Nihin tiang thazaang a ka petu nan dihlak cung ah kaa lawm. Pehtlai in thazaang ka pe rih u, ti zong nawl kan duh ko hna. Vote pek a ka duh mi nih Ooredoo phone lawng a ngah i Text-“3”-7777 ah zeizat poh vote pek khawh ka si,” tiah Ni Len Par Mawi nih The Hakha Post ah a chim.
Ni Len Par Mawi hi Make Me Beautiful ti mi Myanmar rampum huap in tamhmoihtu thiambik laksawng pathumnak a hmu bal mi a si. Myanmar Idol zong ah atu hi minung 10,000 aa zuam mi lak ah minung 8 thim mi lak ah aa tel.
“Myanmar Idol kan i zuam hi ni 4 zaan fatin a si. Ni 5 poh ah result a chuak tawn. Thazaang pek a ka duh mi nih ni 4 zaan poh ah zoh le thazaang pek khawh ka si,” tiah Ni Len Par Mawi nih a chimchap.
Ni Len Par Mawi cu Hakha Khuanu Khuapa Secretary Pu Hrang Vung fanu a si. A taa Nicolas Dawt Kam Sang zong Eian Myant Soneyar Season 9 hlasakthiam zuamnak ah 2nak a hmu bal mi a si.
