All Chin Society le Chin Ramkulh Cozah tonbiaruahnak an ngei

Chinmi Funtomnak Bu tiah Bu dirh thar mi All Chin Society, Yangon hruaitu upa cheukhat hna nih Chin Ramkulh Cozah March 13 ah an ton hna.
Hi tonbiaruahnak ah Chin Ramkulh Cozah Chief Minister, Hluttaw Chairman, Ministers hna le Chin Ramkulh Cozah Chungtuantu le tuanvo ngei upa tampi an i tel kho. Chin Ramkulh Cozah Chief Minister Pu Salai Lian Luai nih honnak bia a chim i All Chin Society Chairman Rev. Peter Ngun Za Cung nih an riantuannak le an konglam tawi chimfiannak zong an ngei.
“Hi Bu hi nizaan naite in kan dirh mi a si. Chin Ramkulh (Chakle le Thlanglei) kan dihlak fonh in kan dirh mi Bu a si. Central Committee hi minung 19 kan si i Executive Committee (EC) hi 80 kan si. Kan i tinh mi hi Chinram a lamkip in a thancho khawh nakhnga le Yangon khua ah hall pakhat sak in mi harsa, mizaw, ramchung ramleng khualtlawng lamli mi hna i dinhnak le Chinram thanchonak he pehtlai in a herhnak poh ah hman ding in Myanmar ram Cozah nih acre 4 hmun an kan pek i kan sak lai. Cucu, a voi khatnak karhlan kan i timh mi a si,” tiah All Chin Society Chairman Rev. Peter Ngun Za Cung nih The Hakha Post ah a chim.
Hi an riantuannak kong he pehtlai in Myanmar ram Vice President Pu Henry Van Thio, Chin Ramkulh Cozah Chief Minister Pu Salai Lian Luai le Yangon Ramthen Chief Minister U Phyo Min Thein hna theihpi in tuan hram an thawk mi a si, tiah kan theih.