By: Salai M.Kkung
Zung phun hi a tam tuk cang i Zung min sak ding zong hi hmailei cun har te dawh in a um cang. A hlei in Chinram ah Company dirh hi zawt rai tlung in tlung kaw, Chinram um minthang deuh le min ngei deuh a si mi min nih a zaat ti hna lo. Bible chung min le Biaknak he aa pehtlai mi min tiang an hman cang. Cu zong nih cun zaat ti dawh in an um lo. Hmailei cun Company min sak ding ah khua min le phun min hna maw kan hman hoi te theih lo a si ko—kan zuat uite min hmanh Company le Zung min ah pek a fawi cang hih.
Zung, Bu, Phu le Company dirh hi Chinmi dah aa fawih bik kan si lai. Cabuai pakhat le thutdan pakhat hrawnghrang hei chiah men in Zung min a putter mi kan tlawm ti lo—zarh khat ah voi khat hrawng hei hon phun. Company min le Zung min hi Chinram cu hun chim lo Hakha le Thantlang chung hmanh ah a tam thluahmah cang i hmailei cun theih cawk le chinchiah cawk hmanh tha te lo in a min aa khat na, a min sullam hmanh thathi in aa chim thiam lo na le, aa fianh thiam lo na, ka si te lai i buaicur in umlulh a si te lai—number in pek an hau te lai. Zung, Bu, Phu le Company dirh hi a sual le a tha lo ka ti duhnak a si hrimhrim lo. Khatlei kam in ruah ahcun thanchonak pakhat ah chiah khawh a si ve. Asinain, mah pumpak ca le chungkhar ca ah dirh mi a si ahcun cucu thanchonak si lo in ram hrawktu an si hnga. Pumpak ca le chungkhar ca ti tik ah miak tawk le hmuh tawk cu a um ko. Aho poh pumpak le chungkhar ca ah riantuan a si cio.
Asinain, chungkhar ca ah a hlei le a dik lo in miak le riantuan cu thluachuah ti awk zong ah tih a nung i fale chan ca tiang ah tihnung mi a si. Chinram ah kan herh taktak mi Zung, Bu, Phu le Company cu rammi ca ah thate le felfai tein rian a tuan mi kha a si. Zung, Bu, Phu le Company tam hi ram thatnak a si lo i felfaite, zumhtlakte le rammi zawnruahnak he riantuan mi Zung, Bu, Phu le Company tu hi ram thatnak le thanchonak taktak cu a si.
Mah pumpak ca ah dirh sawhsawh mi Company a tam tuk cang i Cozah lei in riantuan ding tender sok ding a um caan ah a sok mi Company lebang cu inn tlum lo in a kalh in an i kalh cang. Cu tik ah nihin ni doh lengmang mi i ziknawhnak a chuak. Zik an nawhtu nih rian a hmuh mi a tuan mi a tha lai i sau a daih lai ti mi cu thil si kho lo tluk khi a si. Din lonak in aa thawk hrat cun din lonak in ta a dongh ko lai. Chin Company tampi cu Chinram ca ah kan tuan ti mi lungput a um kho ti lo. Ka tuan poh, tangka ka hmuh poh le ka chungkhar pawcawmnak a tlamtlin poh cun a za. Ka tuan mi a that le that lo, sau a daih le daih lo hi a biapi a si ti lo ti lungput mei aa kau cang—a alh deuh le deuh lo lawng khi a si cang. Hlan ah Kawl pawl riantuan ning cu, a cu e a kha e rak ti tawn mi kha Chinmi nih anmah renglo in kan um cang. Chinmi hmanh nih kanmah ram ca ah tha tein kan tuan lo cun miphun dang pa nih cun tha ngai cun a tuan hnga maw? Rammi tangka in i rumnak, inn i ngeihnak, motor i cawknak le zu i dinnak hi fir ah kan ruat ti lo—zaal chung i sanh sawh ah kan ruah cang. Chinmi nih Company tampi kan in ngeih mi hna, na khua na ram ca ah na thiamnak dihlak in aa dawh bik le a tha bik in riantuan i tim cang tuah u—aho ram ca tuan ding ah dah nan i chiah?
Cun, nulepa nih mitthli le thlanti luan in fimnak cawnter hnu ah Cozah rian a tlai mi le Zung ah a thu mi hna, nan nu le nan pa nih chawnh ngam ding tal cun i ser tuah u, kan um ding zong a si. Cu si lo in atu cu, Zung pakhat luh ah mileng thutnak zong um lo. Rak kan leng, rak thu ti hmanh a um lo—hmaipanhtte cawnhbiak cu um rih seh. Ka ruat tawn, ziah Cozah Zung riantuan mi hna hi mizapi ca riantuan mi an si lo maw? Kan si ti an i ruah ahcun rian an tuanpiak mi mizapi tihzah le upat hi ziah an hngalh khawh hnga lo.
A si lo le mizapi ca riantuan mi kan si tiin dara kan ruamkai? Mizapi nih Cozah Zung chung luh hi a tih in an tih cang hih! Tangka liamnak hmun, mitsen zoh innak hmun, bianek innak hmun le awhrang ngaihnak hmun ah an ruah cang hih! Angaingai cu Cozah riantuantu (Mizapi ca riantuantu) hna an riantuannak hmun an Zung cu mizapi an phak tik ah hngngam ngai in an um ding a si lo maw? Atu cu, cuti si lo in thutnak pek hmanh a um lo. Thutnak pek cu um rih seh, mileng thutnak a chia lo mi Zung hrimhrim a tam tuk. Zung pakhat si ve i mileng thutnak ca ah thutdanh hmanh chiah lo hi zeidah an ruahnak si hnga? Mileng kan duh lo, kan leng hlah u, ti khi maw a si hnga? Zung na thut mi kha ruamkainak ah maw hmang lai ci, nulepa thlanti le mitthli man a si kha philh hlah—mizapi a bawmtu ding ah lungsaute riantuan ding na si zong.
Chinmi nih Zung, Bu, Phu le Company hi tampi a herh, a dik ko. Cu nakin a herh deuh mi cu rammi ca ah a dik mi riantuannak in rian a tuan mi kha a tlawmte zong ah a herh deuh dahkaw. Chinmi nih mi phundang van kan hai hlan ah Chinmi Zung, Bu, Phu le Company nih kan chanhchuah in rian kan tuanpiak hram cang u—tha chinchin le fel chinchin in. Miphun dang nih an kan zoh niam nakhnga lo Chinmi Zung, Bu, Phu le Company nih kan cawisang cang u—dinfelnak taktak he. Chinmi nih Zung, Bu, Phu le Company tampi hi kan herh lo le kan duh lo a si hrimhirm lo, kan duh ngamsam ko. Cu nakin kan duh deuh mi cu Chinram dawtnak he rian a tuan taktak mi Zung, Bu, Phu le Company kha a si.
Ziknawh lo le eihmuar loin riantuan mi Zung, Bu, Phu le Company kha dahkaw Chinmi nih a herh cu! Chinmi nih, Chinmi Zung, Bu, Phu le Company vialte a mi zei miphun dang sin hmanh ah kan in chor ngam hna nakding le kan in chim ngam hna nakhnga nan rian cung ah a dingfel mi le zumh awk a tlak mi si hram u. Miphun dang sin chim ngam lo ding le chor ngam lo ding in maw um lai u ci! ###
