Hakha Peng, Falam Peng le Thantlang Peng chung ah a ummi Zinghmuh tlang cu National Park tuah ding in, Cozah nih lungtlin pinak a tuah hnu khuami cheukhat nih an lung a tlin lo ca ah Thantlang le Falam Peng chung i a ummi ram lawng tuah an timh than tiah Chin Ramkulh, Thingram Zung Lutlai U Kyaw Min Thein sin in thawng kan theih.
Zinghmuh tlang hi rili in pee 8,413 sannak ah a um i, acre 19,000 a kau mi ram a si. Zinghmuh tlang National Park tuah ding kong ah Hakha Peng chung in khuami cheukhat an lung a tling lo tiah theih a si.
Hi kong he pehtlai in U Kyaw Min Thein nih, “Zinghmuh National Park tuah ding kong ah Hakha Peng chung in khuami cheukhat an lung a tling lo. An lung a tlin lo tik ah, Falam le Thantlang lei ram chung lawng ah tuah a si lai. Zeitik indah tuanhram kan thok lai ti cu chim khawh a si rih lo,” tiah The Hakha Post ah a chim.
Zinghmuh tlang National Park tuah ding hi 2018 kum chung ah Cozah nih thawng a rak thanh. National Park tuah tik ah pawngkam minung hna loram hnursuan mi zong tling tein tuanvo laak ding in timhlamhnak an rak ngei tiah theih a si.
Cun, Chin Ramkulh, Thingram lei Minister Pu Mang Hen Dal nih, “Keimah nih ka theih tawk ahcun, khuami cheukhat an lung a tlin lo ca ah tuah lo ding in an hal. Hi bantuk a si ca ah, nihin tiang cu Ramkomh Cozah lei zong nih zeihmanh thawng a thanh rih lo. Thantlang le Falam peng chung a umnak ram lawng ah tuah ding kong hi cu Ramkulh thingram zung lei nih an tawlrel lai,” tiah The Hakha Post ah a chim.
Zinghmuh tlang National Park tuah ding kong hi 2018 kum October a zarh thumnak i Vice President-2 Pu Henry Van Thio Chin Ramkulh a tlawn tan ah Falam Peng khuami hna he ton biaruahnak an tuah i, a thanh mi a si.
Cun, 2020 November 28 ahkhan Zinghmuh tlang lei ah Chin Ramkulh, Sipin Minister le Hotel and Tourism lutlai hna nih zohfelnak an va tuah cang tiah kan theih.
Minister Pu Soe Htet nih, “Chin Ramkulh chung ah caan tling vanlawng a tum ding a si cang. Vanlawng a tum cang lai ca ah ramchung ramleeng khual zong an tampi lai. Khualtlawng lutchuak hna ca ah zeibantuk indah kan sersiampiak hna lai timi a bik in zohfelnak kan va tuah. National Park tuah ding kong ah khuami hna sin in lungtlin pinak kan laak hmasa rih a hau. Hihi kan tuah khawh ahcun Chin Ramkulh ca ah siseh, pawngkam khuami hna ca ah siseh tampi a thahnem lai,” tiah The Hakha Post ah a chim.
Chin Ramkulh thlanglei Laitlang Mindat le Kanpetlet kar ah a ummi Khonumtung National Park hi 2010 kum lio in an rak tuah. Cun, 2012 kum ah Asian Heritage Park ah an rak thlen.
