By: J.Khua Uk-Ukpi
COVID 19 ruangah leng chuah hmanh ah mi hmai khah cu si hlah. Rian le tuan awk tha tuk hlah. Cutin inn chungah ibenh cio cu asi. Plan hmehme te kan ngeih mi zong khi hei let cio cu asi. Caan tha ah ruat in carel hna or tial hna in ila ko ning ka hei ti. Hawi hlan ah vawlei pi ah a rak tlung balmi pul-rai pawl kong khi ka hei rel hna. Cu zong cu COVID 19 nih rel huamnak a ka pek ka ti lai cu.
Kan chan he aa tongmi COVID 19 hi, zeitindah kan vawleipi nih a doh lai? ticu thindomh in zingchiar news update cu zoh le rel cio a si. COVID 19 hi, WHO (World Health Organization) nih March 11 ah Pandemic in a rak thanh.
COVID 19 hlan ah Vawlei record ah hloh awk a tha lomi, milu a sing le a thong in an nunnak a rak latu zawtnak chiakha pawl kha, a tanglei ah ka van tial. Mah nihhin “COVID 19 ruang ah Pathian Bia a tling cang” tiah fawizang ngai in kan chimmi hi na cuanh ning a dan ter men lai tiah kaa ruahchan.
HIV/AIDS PANDEMIC (2005-2012)
Kawlram milu zatceo nak tam (Million 36) nunnak a la cangtu zawtnak pakhat cu kan theih lengmang mi HIV/AIDS hi a si (1981 thawk in). Tulio ahhin, vawlei pumpi ah HIV/AIDS dam lonak a ngeimi milu hi Million 31-35 an si e ti asi i, Sub-Saharan Africa ahhin Million 21 deng an um. An ram milu 5% nih dam lonak an ngeih. Theihnak le fimnak a thancho bantuk in thlopnak lei ah thanchonak a van um. Khel khat cun, hi HIV/AIDS a karh ning thazang te hna a van zor. Ahrik zong cu an van thlop khawh deuh kan ti lai cu. Cucaah 2005-2012 in khan hi zawtnak in a thimi milu kha 2.2 Million in 1.6 million lei ah a rak zor. HIV/AIDS cu a bik in 2005-2012 hrawngin biatak tein a parpazik a rak phak cu asi.
FLU PANDEMIC (1968)
“FLU Pandemic or the Hong Kong Flu” tiah an rak auhmi zawtnak phun khat cu July 13, 1968 ahkhan Hong Kong ah a voikhatnak an rak hmuh. Hi Influenza cu H3N2 hrik in aa semmi a si. H3N2 ticu theih a fiannak bik ding ahcun HIV hrik in AIDS ti a si phun khi a si. Hi zawtnak nih vawleipi innka a van kingh kha, zawtnak an hmuhnak in ni 17 te lawng a rak rau. Hong Kong in Singapore ah a hei lawn. Singapore in Vietnam. Cutin thla 3 hrawng a rauh ahcun nitlak lei ram a rak pha colh. Hong Kong ahhin milu sing 5 (500000) bak te nih an rak i thih pi. Culio an ram milu rel ning in 15% hrawng bak khi an rak thi tinak a si. Hi “the Hong Kong Flu” ruangah hin, Vawlei pumpi in a thimi khi million pakhat hrawng an rak a si (Minung sing 10 hrawng an rak thi).
ASIAN FLU (1956-1958)
US lawng bakah milu 69800 milu nih an nunnak an rak i liampimi zawtnak “Influenza A” zong hi, China ram, Guizhou in aa thawkmi a si (Guizhou hi Bible sianginn ka kaipi ka hawi le an tam ngainak a si). Hi zawtnak in a rak thimi milu hi an chim ning aa dang pah cio. Nain, WHO nih a thanhmi ahcun million 2 an thi a ti. Cu chung ah US milu 69800 an rak si. 1956-1958 ah arak chuakmi zawtnak a si. Hi zawtnak cu H2N2 in asi.
FLU PANDEMIC (1918)
Zawtnak an hmuhnak in zarh 25 kar teah milu 25 million an rak liam colh A rap thlak ko. Tuanbia in rel hmanh ah tuk a sum. Hihi kum 100 hrawng lawng a rau rihmi thil cang a si. Pupa bia cun, “ni-zan tih-ni bia” kan ti lai cu. Hi lio ahhin zumtu tampi nih caan dong cang lai tiah an rak au len men ve ko lai lo maw ka ti. Phundang cun, Pathian bia a tling an rak ti men ko lai dah. A tanglei ah ka peh te lai.
Flu Pandemic a daih tiang kan ti lai cu, mah ahhin minung 20-50 Million hrawng an rak thi (Kawlram pumpi minung dihlak tluk dengmang khi an thi tinak a si). Hi Flu Pandemic hi a dang Influenza he aa dannak cu, kum upa lei pawl, hngakchia lei kam le thazang der cia midam lo hna kha a rak phak hmasa hna i, a rak thah hmasa hna. Hi dam lonak in a zaw cangmi hna cu, damnak tling hmuh ti hi a um thai ti lo.
Hi Flu Pandemic zawtnak ka rel ahcun ka thaw a pit deng tluk khi asi. Ka thlan tifim a chuak deng phun hna in ka um thulh. Vawlei pi le chungkhar pakhat cio khuaci a hei muih lai ning ka hei ruah. Kan chan he aa rak iton lo cu lawmh a um tuk ka van ti lai tiah le a chan he aa rak tongmi hna le thihnak a tuarmi hna kha upat lo le an tonmi harnak khi zeirel piak lo nun a hei lo hoi lai i, an rauthla zong in an theih a nuam lo tuk dingmi bia khi a si hnga. Zei si zongah Pathian kan hmai lei vawlei ahcun hi bantukin tih a nungmi rai chia cu um ti hram hlah seh titu in thlacam khi kan rian a si ko. Hi nakin tamtuk palia nunnak a late zawtnak pakhat a tanglei ah a um rih.
SIXTH CHOLERA PANDEMIC (1910-1911)
Million 25 a rak thatu Flu Pandemic a tlun hlan ahhin minung ting 8 (800000) leng a rak that manhtu zawtnak hrik pakhat a rak um ve. Cucu SIXTH CHOLERA PANDEMIC tiin an auhmi a si. Hihi lai nih hnamtebawng kan timi phun khi si dawh a lo. Chungtlik le luakluak in an um. Hi Sixth Cholera hi India ram in aa rak ithawk i, vawleipi innka a kingh hlan bakah India minung sing 8 (800000) bak nih an rak ithihpi ve. Hihi ramkip a rak pha ve. US hna cu an ton balmi rai ruangah ralrin zia an rak thiam caah minung 11 lawng an rak thi. Hi Sixth Cholera hi India ahcun a um peng rih ko ti a nsi. A thianghlim kho taktak rua lo. Third Cholera Pandemic zong nihhin million pakhat tluk a rak thah ve hna. Avoi khatnak Cholera, avoi hnihnak Cholera tikhin an rak auh hna. A rak chuak theomi zawtnak chia a si, kan ti lai.
The Black Death- Thihnak Khuamui
Kum zabu 14 ah a rak chuakmi Black Death-Thihnak Khuamui nihhin minung kan tuanbia cauk chungah a fak cemmi thih-lohnak a chuahpitu tlangrai chia a si. Hinak fak thih-lohnak a chuahpitu zawtnak hi a um rih lo, tuni tiang ahcun. COVID 19 bal hi aa awtka te lawng a si caah zei a lawh lai cu theih a si rih ve lo. Thin domh in cuan rih kan hau ko. Catialtu keimah sin zongah a pha la lo tiah aamahkhan a um ve hlei lo (cu hraw cu um hram hlah she).
Hi The Black Death nihhin vawlei cung milu 125 Million leng a rak zorter. A zormi milu zat a van tlin than khawhnak ding ah khan Kum zabu 2 (Kum 200) hrawng caan rak lak a si. Hmun cheukhat (Florence) te hna cun Kum zabu 3 (Kum 300) hnu ceo ahkhin zawtnak nih a phak hlan hna milu zat kha a rak a tling kho.
The Black Death hi Centre Asia in aa rak ithawkmi a si ko tiah an zumh. Black Sea cungah Tinbaw in khual a tlawngmi Silk pawl nihhin Crimea ah an hei phurhmi a si an ti. Hi zawtnak hi Black Rats timi zu anak phun ah a ummi a si i, cu zu lak ah a ummi tho or sangkhio in minung sin ah a lutmi zawtnak phun khi a si. An tak a hma. Thli zongin ichawnh a si. Ruak vuaitu hmanh rak um lo tiang in thihnak a ra tlung.
The Black Death ruangah hin, million 200 hrawng an rak thi (Kawlram pumpi milu zat in let 4 deng hrawng khi an rak thi tinak a si). Cun, a dang zawtnak Plague of Justinian timi zawtnak ruang zong ahhin milu million 25 hrawng an rak thi ve thotho. Kan chan he aa tong lomi zawtnak tha lo, tihnung zawtnak hi a rak tam tuk ko dakaw. Arak tlung theo mi a si ko. Chim ding an um len rih ko.
A cung ka tialmi vialte na rel dih a si ahcun, tulio a chuakmi COVID 19 ah Pathian rumro kan puhmi hi pelte tal cu aa zia kho men. Pathian nih a tluntermi a si lo ti zongah ka ti ngam lo i, a si an ti zongah ka zum ngam colh fawm lo. Zumtu nihcun thil harsa kan sin aphak tik ah, khuaruahhar thil kan nun a tlun tik ah Bible ah kal in a phi kan kawl ding cu kan rian a si ko. Pathian sin ah kan au ding cu kan rian a si ko.
Nain mah ruahnak rumro in, silole Bible caang pakhat khat le kan tonmi thil cang aa tonkheng sual ruangah a si cang ko hih, Pathian Bia a tling cang ti rumor au khi cu ipalh sual a fawi tuk dakaw. Bawipa hmai kan bitter tuk sual lai dakaw ka ti theo. Zumtu nih dawh zumlotu sinah Pathian khi lih kan chim ter theo cuh. “Kum 2000 ahcun caan a dong cang lai, Pathian nih a kan chimh. Larnak ah kan hmuh” a titu pawl khi, an min ka char khwh tuk rih hna. Cucu mang tuktak hna fak tuk in kan thlir caah a si tawn cuh (Mang ah Pathian nih a kan chawn lo ka ti duhnak cu a si lo).
Tutan, COVID 19 zong ah Prophet phun in bia phuan cu ralrin ah a tha ko ka hei ti. Pathian nih Bia a kentermi hna kan um taktak a si bal ahcun mipi nih kan zumh khawhnak hnga, Thiangthlarau tu nih kan bawm hram ko seh.
COVID 19 damnak sii zeitik dah an hmuh lai?tiah thinddomh in cuanh cio asi ko hih.
