Myanmar rampi thimnak a dih cang ko nain Chin ramkulh chung ah cheukhat party palai pawl cu UEC ah min a thu rih lomi an um rih, tiah kan theih.
Rampi thimnak a dih hnu in teinak a hmu mi Party palai zong nih siseh, a sung mi Party palai zong nih, meezung commission le UEC ah mee an rel mi kha tlamtling tein aa zuammi Party palai sin ah thawngthanh a si. UEC nih thimnak result a thanh dih hnu in aa zuammi Party palai pawl nih min pungsan 16 le 19 ah min thut ding a si.
Hi kong ah, cheukhat party palai min a thu cang mi le a thu lo mi kong he pehtlai in USDP Party in aa zuam mi Dr. Hmuh Thang nih, “Tuan piin kan rak thu lo i, atu tiang zong kan thu lo. Thimnak an tuah ningcang kha kan duh deuh lo caah a si ko. Min thut loin kan um thai ko lai. Min kan thut duh lonak a ruang cu, commission riantuannak kan lung a tlin lo caah a si ko. Min kan thut lo mi ruang ah hin hmailei kanmah ca ahcun thinphan ding zong a um lai tiah kan ruat lo. Kanmah Party chung in cheukhat cu min a thu mi zong an um ko nain a tam deuh cu kan thu lo,” tiah The Hakha Post ah chim.
Thimnak result le Commission riantuannak a dik lo, a hman lo, timi ruangah atu December 9, 2020 tiang aa zuammi Party palai cheukhat cu min an thut lonak a si, tiah thawng kan theih.
