By: Salai KB Thawng
Hi cabia ka tial mi nan rel tik ah, “Catialtu nangmah cu zei hlei dah na si. Nangmah hna cu…,” tiah biahalnak tampi he neek khawh ka si. A bik in Living Church pawl nih nan ka huat ngai lai ka zumh. Ka tial ngam ve bantuk in huat phu zong a si ve, tiah ka ruah ca ah aa chol mi nih hun ka meet len te ko u! Cun, kan sining cio zong i hmu in thil umkalning kha fianrial a herh mi kha suktuah deuh a hau cang.
Nan tulh le nan laam lio ah khin
Nan tulh le nan laam lio ah khin kan sualpalh cio bu ah Pathian thangthat ruah ah Biakinn kan hung phan cio nain mak hngal loin nan laam. A laam ve lo mi cu aa pum mi kan si rua lo hih! Kawl holh i ‘puai-cih-parih-tet’ ti mi khi kan si. Kan in zoh hna, kan in hngah hna. Zoh hmanh u, cheukhat cu an dir cawk lo i an thu diam ko. Nan tulh le laam a dih cu hme kan in hngah hna cu. Pakhatpa nih, “An tulh le laam zoh ruah ah aa pum mi kan lo. Pathian thangthat ah a rak i pum mi khom kan lo ti lo,” tiah a chim mi hi ruah phu a si. A tuul-laam ve lo mi kha piangthar lo ah kan ruah hna ai. Cuti asiah, a tuul-laam ve lo mi hi vancung khua a phan lo ding maw an si hnga, ti zong ruah a phu ngaingai.
Mituul le milaam pawl soisel sual
Kan tulh le laam hun i soisel sual citcet cu a soiseltu kha Sehtan hmanh ah a tumkalangpi kan lo. Biakinn chung lawng piangthar tham cu zuuri sabah hmanh nih hme kan in zumh hna lo cu! Pathian hi Biakinn chung lawng ah maw a um? Lung nan hring bak cuh! Biakinn chung ahcun a nun bu in vancung kai ding nan lo nain a leng ahcun holhchia holh mi, innpa nih celh lo mi, mi kong ceih ah a hmur sau hlei mi le mi puarhraang hna kan si sual tawn i zumh awk cu nan tha lo. Misual e, zuuding sa-ei e kan ti mi hna he khin kan i dannak ka hngal bak lo. Tlukceo le keucheu thiamthiam kan si hna. Atu ka tial mi ca a rel mi nih, “A tlau cang,” hei ti phun in thla nan ka campiak khawh men. Asiloah ah nan nuar in nan ungthu kho men, ti zong ka zumh.
Tulh le laam hi maw pianthar hmelchunhnak kan ti rih?
Kei cu ka zum lem lo. Laam ka pom lo, ka ti lo. Holhtheihlo le tulh te hna kan pom lo, ti kan chim duhnak zong a si fawn lo. A ngaingai cu catialtu keimah hi Living Church ka si ve ko. Asinain, ri kan khiah mi, asiloah pianthar tahfung kan hman mi hi tulh le laam hna an si sual ahcun tlau deuh bia a si deuh lehlam men lai.
Catialtu keimah bantuk, zei huaha a si ve lem lo mi ka hawipa pakhat nih capo in, “Nan innpa chakthlang i a puarhraang mi, mi kong ceih a zuam ngai mi, tih a nung ngai mi le innpa he aa rem lo mi nan hmuh hna ahcun, Biakinn chung ah piangthar aa ti mi an si, ti kha hngalh peng ding an si. Cun, Biakinn chung ah a piangthar ngai mi pawl khi innpa chakthlang he aa rem bak lo mi an si ti zong hngalhchih fawn ding,” tiah a chim bal i cu zong cu capo a lo nain ruah a phu ngaingai mi a si.
Piangthar pawl zohchunh kan in duh hna
Biakinn chung ahcun vancung kai colh ding in kan in hmuh hna nain a leng ah kan in zenh bak hna. Minung cu a palh kho mi kan si, a thianghlim taktak mi zong kan um fawn lo. Biakinn chung piangthar pawl zong nih a thianghlim mi ah kan i ruah awk a si hlei lo. A tuul-laam ve lo mi zong piangtharlo ti khawh an si thiamthiam lo. Zeiti a va si hmanh ah piangthar aa ti pawl nan sining nih kan sining cio kah sehlaw nan nunning le nan sining cio nih kan cawnpiak seh ti zong kan duh. Atu ning hin cun kan piangthar deuhdeuh, tih kan nung deuhdeuh.
Laam ko usih! Tuul ko usih! Holhtheihlo zong in holh ko usih! Biakinn chung lawng ah a piangthar mi si ve hlah usih! Pathian hi mahle sining cio in kan thangthat cio bantuk in a tuul-laam mi lawng nih piangthar ah i ruat hlah u! Cun, tulh le laam hi pianthar hmelchunhnak a si lo zia zong hi hngal tuah usih! Tulh le laam khawh deuh caan poh i a piangthar mi hmuh in i hmuh i hun tulh laam khawh lo caan ah hnu ah a pil mi, thlarau thazaang a der mi ah kan i ruah mi zong hi tuak deuh usih! Hei tulh laam khawh poh i a piangthar le laam khawh lo caan poh i a tlu mi le a der mi hmuh in kan mahle kanmah kan i hmuh mi hi a poi ngaingai mi a si, tiah ka ruah. Kan palhnak Pathian nih kan ngaithiam seh, tiin ka bia ka donghter chung rih lai. #
