Tlangcung miphun ca ah a biapi bik a si veko lai. Cheukhat nih “NLD cozah a kai ahcun Federal a kan pek lai” an ti. Federal phung hi “serchom” a hau mi a si, “ready-made” a um lo. NLD lawng nih a ser a ser lai i “hmang cang uh” tiah pek khawh mi phung a si lo. Tlangcung mi he serti a hau mi khi a si. Serti tik ah fakpi in a kan deet ko lai, kan i reng lai.
Kan hal mi vialte “yes” a kan ti dih lai, tiah zeitik hmanh ah kan beisei hlah usih. U Aung San zong nih Panglong ah fak tuk in a rak kan deet cang. A fanu zong nih a kan deet te ko lai. Zeica tiah “confederation” aa chuahsual lai kha fak tuk in an veen ve ko lai. NLD le USDP nih bia thlumthlum in “federal”tiah an au lengmang. Hi bantuk biathlum ah ri hlah usih. Federal model cu a tamtuk. Zei bantuk model an i tlaih ti mi kan thei rih lo – i deet le i rengh pah in “serti” kan hau.
Tlangcung mi he kan i deet tik ah tlangcung mi kan thazaang a der tuk ahcun sum phomh in an kan phomh lai. NLD le USDP chung in kan rak i hrolh cia dik lebang ahcun rulpi nih uitlak a lemh bang dolh cia le lemh cia mi khi kan rak si lai caah zeihmanh kan co ding a um lai lo. Cucaah tlangcung miphun thazaang thawnter le cahter a hau tuk ko, kan tinak cu a si.
(Biakilh : Hmuh ning hi The Hakha Post dirhmun a si lo, a tialtu dirhmun a si)
