Myanmar ram thimnak a nai cang i party kip nih tanhmi kan ngei cio, i tinh mi zong kan ngei cio nain rampi huap in kan duh mi cu aa khat dih ko tiah, Pu Tial Ling sin in kan theih.
“Tlangcung mi nih kan duh mi federal phanh nakding ah hin NLD party nih aa hmaithlak bantuk in kum 4 chung a tuan mi ah federal cu a herh cang tiah an hmuh pin ah 2008 phunghrampi a rak tuah tu ralkap zong nih federal uknak cu an lungtling ko, kan duh ko lai tiah min an thut mi cu Pyitaungsu lungtlinnak cahren mi 21 Panglong Conference ah min an thut ve mi kan hmuh tik ah, a hlan ah federal kong chim hmanh tih nung a si lio ah atu ahcun anmah ralkap lila nih Pyitaungsu lungtlinnak cahren ah min an thut ve cang ti kan hmuh khawh cang. Cucu NLD party nih tuanchuah khawh ding, phanh khawh ding aa zuam lengmang lio mi cu a si,” tiah NLD Pyithu Hluttaw Candidate Pu Tial Ling nih The Hakha Post ah a chim.
“Keimah cu Pyithu Hluttaw in teinak ka hmuh ahcun Pyitaungsu Hluttaw ah a kai ding ka si caah ka tuanding mi rian cu Hakha peng in a herh mi Pyitaungsu Hluttaw le vaunci pawl sin an hal i hmuhding in zuam piakding kha ka tuanvo a si. Cun, Hluttaw meeting pakhat a dih tik ah mee ngei tu hna sin ah kal in fianter nak tuah ding a si. Pyitaungsu Hluttaw ah ka kai khawh a si ahcun Hluttaw palai pakhat nih a tuan ding rian cu tlamtling tein ka tuan ko lai ti zong mizapi nan sin ah chim ka duh. Ram le miphun dawt timi ka hmuhning ahcun kan umnak hmun, miphun le ram thanchoter ding kha a si,” tiah a chimchap.
