Union Election Commission nih, 2020 kum Myanmar ram thimnak ah thimnak tuah kho lo ding hmun a thanh mi he pehtlai in, tlangcung party, party 5 nih zohfelnak tuahpiak than ding le zohpiak than ding in an hal tiah thawng kan theih.
Thimnak tuah lo ding hmun cazin hi 2020 October 16 ah Union Election Commission nih a thanh. A thanh mi chung ah, Kachin ram peng 11 chung in khuatekomh khua 192, Karen ram peng 6 chung in khuatekomh 53, Mon ram peng 1 chung in khuatekomh 1, Rakhine ram peng 9 chung le a dang peng 4 chung sang 15 le khuatekomh 137, Shan ram peng 6 le a dang peng 17 chung in sang 8 le khuatekomh 133, Bagu ramthen peng 2 chung in khuatekomh 42 hna an si.
An hal than mi kong he pehtlai in, thimnak tuah lo ding in an thanh mi ANP party in aa zuam ding Hluttaw Palai U Naing Win Aung nih, “Democracy in a kan kalpi mi ah zumhawk a tlak lonak hi a lang chinchin cang. Democracy lam kan zul, Federal lam kan zul an ti i, mizapi ca ah fahnak a tam chinchin. AA lei zong nih thimnak tuah lo ding in nawl a chuah mi zong a um bak lo. Cun, thimnak tuah a tlak lo tiang in remdaihnak a um lonak hmun zong a si fawn lo. Atu thimnak tuah lo ding in an thanhnak zong hi 2015 lio ah ANP party kan thawn biknak hmun a si. 2020 kum zong ah teinak kan hmu bak lai ti kan i zumhnak hmun pawl an si,” tiah The Hakha Post ah a chim.
Hi kong ah zohfelnak tuahpiak than ding in a hal mi tlangcung party hna hi Chin ram in Chin National League For Democracy (CNLD), Kachin in Kachin State People Party (KSPP), Karen in Karen National Democratic Party (KNDP), Kayah in Kayah State Democratic Party (KSDP), Mon in Mon National Party (MNP) hna an si.
Cun, zohfelnak tuahthan ding in a hal mi chung in CNLD party in chimphuannak nawlngeitu Salai PP nih, “ Atu bantuk in kan tuahnak a ruang bik zong hi tlangcung mi ciocio kan si hna i an ngaihchiatnak kan hrawmpi hna timi langhternak zong a si. Cun, UEC lei zong nih atu bantuk in an tuah ding a si hrimhrim lo ti hi kan langhter mi a si. Atu UEC hi NLD nih a thim mi an si. Hi kong ah tanhhlei a ngei kan ti zong a si lo, a ngei lo kan ti zong a si lo. Asinain, an rian ahhin mizei cung hmanh ah i hngatchan loin an tuan ding a si,” tiah The Hakha Post ah a chim.
Atu bantuk in UEC nih thimnak tuah lo ding hmun a thanh mi pawl hi 2015 kum thimhnak lio ah NLD a rak sunghnak le tlangcung party pawl teinak an rak hmuhnak hmun an si tiah theih a si.
