By: Pu Uk Nawl
1948 ah US President a rak tuanmi Harry Truman chan in US President sin kip ah thla a rak cam lengmang i, American pastor tiah an auh i vawleicung envagelist minthang Billy Graham nih American zapi cu, “mee” thla dih u, tiah a rak forhfial hna. Mee thlak hi kan covo lawng si loin Pathian nih tuanvo a kan pekmi a si, a ti.
Mi tampi nih tukum cu mee kan thla lai lo an rak ti. Pi Clinton zong kan thla lai lo i, Pu Trump zong kan thla ve lai lo, an rak ti. Billy Graham nih hitinhin a rak ti hna. “Zapi nih mee kan thlak lo a sic un a rauh hlan ah kan luatnak (Freedom) a tlau kho. Cun, nawlngeihnak a duh tukmi uknak tang ah kan tla lai,” a rak ti hna. A peh rih mi cu, “Vawleicung ah zeibantuk phung le lam hmanh a tlingmi a um lo. Kanmah USA zong kan tling ve hlei lo. Mizapi nih kan ram kong ah zei poi loin kan um ahcun kan ram cu a tla ko lai. Mee thlak hi kan ram humhaknak ca ah kan thlakmi a si i thil hman kan tuah zong a si,” tiah a rak ti. Jesuh nih a zultu hna sin ah hitihin a chim. A chiahru tukmi Rom uknak hmanh kha Jesuh nih a doh lo. A zultu hna a timi hna cu, Cozah a simi poh dirkamhnak ca ah nan tuah khawh mi poh nan tuah lai tiah a forhfial hna. Mathai 22:21 ah Jesuh nih Caesar ta cu Caesar sin ah pe ko u, Pathian ta cu Pathian sin ah pe ko u, a ti. Jesuh nih a si khawh chung in uktu Cozah thazaang pek ding hi a rak forhfial hna.
Ram hruaitu Cozah pohpoh hna i an riantuan nak hi thazaang kan pek i kan dirpi ding a si. Thil sining theih khawh i zuam ulaw kan thim dingmi dirhmun zong theih khawh i zuam u. Cun, Pathian kha hal ulaw mee thla u, tiah a forhfial hna. A peh rih mi cu, mee zong nan thlak lai i, ram ca ah santlai mi si nan i zuam lai, a ti hna. Cun, ram hruaitu hna ca hrimhrim ah Pathian duhnak an zulh khawh nakhnga thla nan campiak hna lai a ti hna. Ram hruaitu ca ah thlacamnak ngeih ding hi Paul zong nih a kan fialmi a si (1 Timo 2:2) tiah a chim.
Fa pahnih a ngeih hna i an pahnih in ram ca le Pathian rian he biatak tein an i pumpe. US ramkip ah Frankin Graham cu thlacamnak ngei ding in khual a tlawng i, zapi ca le hruaitu ca ah biatak tein bia a chim i thla a cam. Thimnak ah mizapi an i tel khawh nakding ah biatak tein thazaang a pek hna. A fapa Graham nih a chimmi cu, US president aa cuh mi ah duh deuhmi le tanhmi ka ngei hna lo. Asinain fak piin thla kan campiak hna lai. Kan dihlak in mee kan thla hna lai. Asi khawh chung in Bible a zulmi poh hi kan thim hna a herh tiah a chim. Tutan thimnak hi kan tuanbia ah a biapi cemmi a si. US hi a kalnak lam a hman ti lo, Pathian lawnglawng nih a mer khawh cang lai. Hi ruang ah kan ramthen (State) 50 ah kan kal dih lai i kan ram ca ah thlacamnak kan tuah lai a ti.
A farnu Anne Graham Lotz zong nih, a ho kan thim hna kha biapi si loin Pathian mipi nih thla kan campiak hna kha a herh deuh a si tiah a chim. A ra lai mi kum 2020, November thla 8 ni i tuah dingmi Myanmar pumpi thimnak a tlamtling khawh nakding ah thlacam cio hna sih. Thimnak kong he pehtlai in kan lungput le ruahnak fim a kan chimtu le a kan bawmtu a si hnga maw tiah ruahchannak he ka hun tial mi a si.
