2020 kum thimnak a dih hnu Chin State Election Commission zung ah Peng in report a tuah mi an tam tiah thimnak zung riantuan Secretary Pu Lin Kyaw sin in kan theih.
“Pumpak in report a rak tuah mi cu an um lo nain, peng aiawh in a tuah mi an tam pah ngai. Report a rak tuah mi Peng hna hi Kanpetlet, Tedim le Tonzang pawl an si. Hi report an rak tuah bik mi hi, hlankan mee thlak ning kong le hnon mi mee le a fek mi mee kong ah a si. Hlankan mee thlak hi 2020 October 29 in November 7 tiang a si. Hlankan mee chung ah hin Quarantine ummi pawl, sii-inn ah a ummi, thonginn ah hren mi, zung ah rian a tuan mi le inn ah a ummi pawl tiin then a si. Upadi nih a langhter ning ah hlankan mee thlak tik ah Hluttaw Candidates pawl nih zulh khawh a si ti aa tel. Asinain, anmah an i tel lawng ah mee thlakter ding timi aa tel lo. Chim duh mi cu atu bantuk in report an rak tuah mi hi thimnak zung rian ngei pawl nih hlankan mee thlak tik ah an kan auh lo ca ah tiin an rak tuah mi a si. Kanmah lei zong nih hi kong ahcun zeihmanh kan leh rih hna lo. Rian ngei hna nih upadi ning loin an tuah si loin upadi chung in an tuah mi a si ko ca ah a si,” tiah Pu Lin Kyaw nih The Hakha Post ah a chim.
2020 kum Myanmar ram party tling democracy thimnak ah, NLD nih rampi huap in Hluttaw mee hmun 920 ah teinak a hmuh i, USDP nih 71 a hmuh ve tiah UEC nih 2020 November 15 ah a thanh.
Cun, Pu Lin Kyaw nih, “Atu bantuk in report an tuah hi a fawinak in chim ko ahcun an sunghmi an i cohlan khawh lo ca ah a si bik ko. Mee zung zong ah Hluttaw Candidate pawl nih mee zung hngak minung pahnih cio hngahter khawhnak nawl an ngei. Hi an hngahter mi hna nih hnonmi mee le a fek mi mee kong ah al khawhnak nawl an ngei ko. A caan lio ah al loin an sungh dih hnu ah atu bantuk in an rak tuah hi cu kanmah lei nih zeihmah leh awk a um lo,” tiah a chimchap.
2020 kum thimnak ah Chin Ramkulh chung Hluttaw mee hmun 39 chung ah NLD nih 36, ZCD nih hmun 2 le CNLD nih hmun 1 teinak an hmuh hna tiah kan theih.
