Pu Tial Ling
Rampi thimnak zong a nai cang bantuk in kanmah NLD kan thawn ahcun Lai tlang caah Sethmuhzung hi a hmasa ah kan tuah lai, tiah NLD Pyithu Hluttaw aa cuh ding Pu Tial Ling sin in kan theih.
Hi kongah Pu Tial Ling nih “Keimah ka tlin ahcun Pyithu Hluttaw palai meeting ka kai lai caah, ka duh mi le kai timh hmasa mi cu Lairam ah hin Sethmuhzung pakhat um ter ding ka timh mi a si. Laitlang ah Sethmuhzung a um a hau. Hakha in India ram ah lam tha tein motor in kal kho ding hi ka saduhthah a si. Kawlram le Thailand duh tawk in an i tlawn bantuk in, kannih zong India le laitlang hi duhtawk in umkal kho ding hi ka timh mi a si. Ramri gate tha tein tuah ding. Mah cucu Laitlang caah a si.
Cun Hakha ca he pehtlai in ka duh mi cu, Hakha ah Sianginn thatha um kho ding kan herh. Sianginn tha kan ti tikah “pumcawm nak pe kho tu sianginn” tha mi hna kan herh. Cun Hakha kan Sii-inn pi ah hin Ihkhun 500 a um lai ti a si nain nawlpek nak cu a um rih lai ka zum lo. Cu Ihkhun 500 um ding hi a biapi mi taktak cu a si lo, Siibawi te hi tling tein an um khawh nakding hi tawlrel ka duh.
Cu lawng siloin zawtnak a kawl kho tu seh thilri pawl hi tling tein um kho seh ti ka duh. Cun Thi le Zun cheknak datkhuaikhaan um sehlaw ti ka duh. Cun Hakha peng ah ti tha tein a hmu rih lo mi khua pawl ah hin ti tha tein an hmuh khawh nakding ah kan i zuam a hau. Cun Electric hi a si khawh chung in kanmah kum 5 chungah Hakha peng vialte hi phan kho dih seh ti ka duh. Cun, Thantlang peng zong ah a phan dih ve lai. Mah he pehtlai cun keimah lawng nih direct in ka tuan khawh ding mi a si lo, Chin ramkulh cozah he hmunkhat ah kan tuanti lawng ah a tlamtlin ding mi a si. Cucu keimah pumpak in thimnak ah ka tlin khawh a si ahcun ka timhmi ka chunmang le saduhthah a si tiah, The Hakha Post ah a chim.
