Thantlang khuapi chung um mi khrihfabu cheukhat hna nih, 2020 Merry Christmas tuah ding le tuah lo ding ah an cawlcanghnak ding kong hi zei bantuk in dah kan tuah lai ti mi hi kan i ruah lio pi a si tiah an chim.
COVID-19 zawtnak ruang ah corol zaanvahnak zong khrihfabu nih an tuah kho lai lo tiah kan theih. Tukum Christmas le Kumthar cu Cozah nih miung 50 tiang tuah khawh a si lai tiah ca chuah in thawngthanhnak a rak tuah tiah theih a si.
Merry Christmas tuah ding le tuah lo ding kong he pehtlai in, Thantlang UPC church pastor Rev. Biak Mawng nih, “Cozah lei nih minung ri khiah in tuah uh ti si tik ah kannih khrifabu hi member kan tampah tik ah biakinn ah tuah awk a that lo caah meeting kan tuah i sa tu hi i that seh law aa hleh tu in kan i hleh lai tiah biakhiahnak kan tuah.Kan khrihfabu chung ah hin kumkhua upa cang mi tar tete hi pali nga hrawng kan ngeih hna, mah hna pawl le Pastor te riantuantu hna, khrihfa upa, mino upa, nubu upa he mi tlawm tein biakinn ah hin cun caan hman kan i tim. Hi bantuk Christmas le Kumthar caan ah hin khrihfabu chung i a um mi kum 70 cung minung pawl hi laksawng peknak kan tuah tawn mi a si. Tukum hi Christmsa he Kumthar he hin tuah ding hi a fawi lo caah atu bantuk in Christmas ah hin laksawng peknak le rawldumtinak hi i tuah lawlaw ko seh kan ti nak hi a si” tiah The Hakha Post ah a chim.
Thantlang United Penticostal Church hi member minung 570 hrawng an si.
Cun, Thantlang JMBC khrihfabu ah rian a tuan mi Pastor Lian Chawn nih “Cozah lei nih Christmas tuah nak ding caah minung 50 tiang lawng hi cohlan a si caah zulh phung an ser mi cu zulh a hau. Kan nih khrihfabu hi cu zei tin kan tuah lai ti hi a fiang rih lo, anmah le an sang cio ah khrihfa bu nih sa thah piak in maw kan tuah lai, Christmas rawlhrawmnak caah chungkhar kip sin ah meh cawknak caah tiin tangka in dah kan pek hna lai ti hi a fiang rih lo. 2020 December 15 ah meeting kan tuah lai i khi tik ah a fiang te lai” tiah The Hakha Post ah a chim.
Myanmar ram chung ah khrihfabu hi 20000 leeng an um i hi chung ah Baptist khrihfabu hi 5000 an um tiah MBC zung in theih a si .
Photo/ Thantlang JMBC
