2020 November 8 thimnak ah teinak hi ka hmuh hrimhrim lai, tiah kaa ruahchan bantuk in sungh phung zong a si ca ah ready ka si thiamthiam fawn i, atu ka dirhmun ka phanh ti lo zong ah miphun le ram ca ah riantuan hi a biapi mi a si ko, tiah Chief Minister Salai Lian Luai nih September 23 ah a chim.
Cheukhat hi Party EC nih thim lo le fehter lo hmanh ah an i ngaihchiatpi ngai va si kaw, nang tah, sungh ding ah ready na si ve maw, ti kan hal mi kong ah atu bantuk in Chief Minister nih The Hakha Post ah a fianter hi a si.
“Chief Minister cu si than ning law rian hmabaak (tuanchuah dih rih lo mi) tampi a um rih i ka tuan khawh deuh hnga. Minister pakhat ka si zong ah cu thiamthiam. Asinain, cu dirhmun theng ka dir khawh lo zong ah Hluttaw Palai pakhat dirhmun in kan miphun le ram ca ah a herh mi chimrel le tuan kha biapi ah ka chiah peng ko lai. Zeicahtiah, hmuhton (experience) kum 5 tluk kan ngei cang i riantuan zia zong kan thiam cang. Teinak tu cu Pathian kut ah a um mi a si ko. Minung lei sinak tu cun, Chief Minister dirhmun hi kaa ruahchan rih ko. A ruang cu, Ramkomh huap in NLD nih kan tei ko lai ca ah hmuhton a ngei cang mi cu cunglei nih an kan papek ko lai,” tiah Chief Minister Salai Lian Luai nih The Hakha Post ah a chim.
CM Salai Lian Luai nih a chim rih mi cu, “Chief Minister siseh, Minister pakhat siseh, Hluttaw Palai siseh, ka tlin ahcun rian tampi kan tuanchuah rih lai. Tahchunhnak ah Chin Ramkulh khua tampi ah Education College kan tuah khawh cang. Hakha College zong University ah a tling cang. Cun, atu Bungzung (Lei-um) Mirang vawlei sehzung te hna, Chin Ramkulh lamsuul vialte hi concrete tal in phah dih sih, ti kan duh. Atu hi COVID-19 phihkharnak um hlah sehlaw kan lamsuul hi cet (nawncek) um lo ding bak in kan lamsuul hi kan tuah lai, tiah saduh kan thah mi le kan i timh mi a si,” tiah The Hakha Post ah a chimchap.
Atulio Chin Ramkulh Cozah Chief Minister Salai Lian Luai cu a ralai mi 2020 November 8 rampum huap thimnak ah Falam Pyine No. 2 meehmun ah CNLD Chairman Pu No Than Kap he aa zuamcawh ding an si. Lutlai pakhat veve an si tik ah ahodah aa tei lai, ti cu lungchung ah a um cio mi a si bantuk in anmah zong nih teinak hmuh ding an i ruahchan veve i sungh ding zong ah ready an si veve thiamthiam, tiah kan theih.
