Myanmar ram chung COVID-19 zawtnak ngei a karh chin lengmang lio ah nihin 2020 December 3 zaan suimilaam 8:00 tiang a hnu bik Ramkomh Ngandamnak le Zaanglek Zung nih a thanh ning ah zawtnak ngei hi zawtnak a rak chuahnak Taluk ram nakin Myanmar ram chung in zawtnak ngei an tam deuh cang tiah theih a si.
Nihin tiang Taluk ram chung ah COVID-19 zawtnak ngei Cozah nih an thanh ning ah minung 86,000 leeng an si i, Myanmar ram chung ah zawtnak ngei dihlak minung 93,000 leeng a si ve cang in Taluk ramnak in zawtnak ngei an tam deuh cang.
2020 December 3 zaan suimilaam 8:00 Ramkomh Ngandamnak le Zaanglek Zung nih a thanh ning ah zawtnak hmuhchap mi mizaw thar minung 1,418, zawtnak in a dam than mi 1,147 an si tiah a thanh. Cun, zawtnak in a dam than mi dihlak minung 73,748, zawtnak in a thi thar mi minung tuzaan ah 30 an i chap ca ah nihin tiang a thi mi minung 2,028 an si cang.
Myanmar ram chung ah Yangon ramthen hi zawtnak hmuh mi a tam cemnak hmun a si i, a pahnihnak ah Mandalay Ramthen chung hi zawtnak hmuh tam cem a si.
