Hmuhning
By: Parthlam
Thimnak aa thoknak cu Eden dum in a si i Pathian nih duh thimnak a pek hna nak in aa thok.Thimnak tuah timi cu thim ding mi a um ca ah a si. Thimnak tuah hlan ah thim ning ri a um hmasa. Cu rikhiah mi chung in thimnak tuah a si tawn. Rian hmun a lawn caan ah rikhiah mi a tlinh mi poh thimnak chung i tel ding in zapi sawm i sok khawh a si. A sok mi tampi lak ah mi tlawmte, rikhiah mi zat lawng thim an si. Sawmmi cu an tam ko nain thimmi cu an tlawm tawn.
Lairam cu Khrihfa ram a si kan ti i kan i lunghmuih ngai. Lunghmuih phu hrim a si. Kawlram minung dihlak chung ah zakhat ah paruk (6%) hrawng lawng pei Khrihfa cu kan um fam cu. Asinain Khrihfa ram kan sinak le Khrihfa kan si kan langhternak hmun hi Pathian thangthat pumh caan le kan hmatpungtin lawng hna ah a si sual maw, ti cu atu kan dirhmun in ruah a phu ngai cang. Zumlotu nih “Zumtu, Khrihfa a si khih” ti hmuh awk in kan nun le kan tuahsernak ah kan langhter mi a umlo ahcun zumlotu he kan i tluk, kan i dang lo tinak a si ko hnga.
Zumtu hmasa hna cu carel le a tial thiam zong an tlawm, chimrel zong an thiam tuk lo nain an Khrihfa sinak kha an nun in an langhter. Lihchim an duh lo, thil dik an tanh. Mah i thangthat an duh lo. Hruaitu bia an ngai. Tinam khua Khrihfa hmasa Pu Ui Hmuh cu a unau a tlawng hna. Zu din an rak fial. “Khrihfa ka si cang i zu cu ka ding lai lo” a rak ti hna. An tlaih i a kaa ah zu cu an tuhchih. A chak than. An khua ah a kir, “Zu ka unau nih an ka hmawmter ca ah misual ka si, pumhnak caan hmang ding ah kaa tlaak lo. Caan ka thiah rih hlah u” tiah fiang tein a chimh hna.
Atu chan cu fim chan, cathiam chan, Information Technology (IT) chan ti a si. Vawlei pi hmanh khuate pakhat (Global village) tluk a si ti chan ah kan phan. Laimi Laica rel kho lo hmanh vawlei cung ram kip kan phan cang. Zapi nih a mui hmanh rak hmuh khawh lo mi le atu tiang a min hmanh thathi in chim a thiam lo mi zong nih Telephone (fawn) kan i tlaih dih cang. Kan thangcho ngai i lawmh awk a si ko. Facebook le YouTube lebang ahcun vawlei cung thilcang hmuh khawh dih a si cang. Thil tha le tha lo i cawhhrup in a lang mi chan ah Laimi kan sining le kan lungput fiang ngai in a langhnak cu facebook catial, ca tlah mi le comment ah a si rua, tiah ka ruah.
Mi cheukhat facebook thlah mi le comment tial mi cu mi hnundu nih cun rel ngam le zoh ngam lo ding tamtuk a um. Sual forhnak le hlennak bia zong tampi a um. Pathian bia i laak riangmang in mi a soi mi le a thangchiat i siikter mi zong an um. “Pathian min cu ningcang loin va hmang hlah” ti zong kan thei ko nain ningcang loin a hmang mi kan tamtuk. Facebook in laar aa zuam mi le aa porhlaw mi kan tamtuk cang. Midang thangchiat khawh le soi khawh hi thawn ah a ruat mi zong kan um. Laimi kan chunglei lungput a langhter tu bik cu facebook a si ko, tiah ka nolh ko rih lai. Hi ti si hi maw Khrihfa si cu a si ko hnga ti hi zumlotu nih ruah lo awk thalo in kan um cang. Atu kan dirhmun cu “Mit ca ah mit ve, haa ca ah haa ve” dirhmun ah kan dir ko lo hme maw? Vancung pennak he aa hlaat mi kan tam ko cang rua. Pathian soi mi si hi tih a nung tuk. Pathian nih a kan soi lo nakding ah midang soi ve lo ding (Mat. 7:1) a si. Pathian pennak co nakding ah dawntu cu thatlonak le midang congoih hman (1Kor.6:9-10) hna hi an si. Vancung pennak co nakding le thimmi chung i tel khawhnak lam cu “Mi chambau, mi tlaamtling lo, misual ka si” (Mat. 5:3) ti i hngalh i, Pathian duh ning in nun i zuam le minung hawi le sermi thil cung i thatnak tuah khi a si. Atu kan dirhmun cun Sawmmi (Khrihfa) cu kan tam ko nain thimmi tlawm dawh kan si ko hih. ###
