Chinramkulh, Rih Khuadar peng ah Rih tidil khuacuannak (view point) tuah ding timhtuahnak kan ngei, tiah khuabawi Pu Cin Lam Khai sin in thawng kan theih.
Rih tidil khuacuannak tuah ding mi cu khuabawi Pu Cin Lam Khai hruainak in Sipin committee, thingram zung, sang bawi hna he tuanti in October 16 ni ah hmunhma zoh nak zong an ngei. “Atu khuacuannak kan tuah nak ding hmun ih atu khuacuannak View Point nak in a hmunhma a tha deuh. Rih tidil kha hnulei background ah chiah i hmanthlak zong a ngah. Rih tidil apple hmuisam a langhnak le a pawngkam pangpar dum hna zong fiang tein hmuh khawh a si. Atu i View Point hi cu tanghra sianginn area chungah a um caah luhchuahnak zong a rem lo ngai. Cu khuacuannak hmun thing cu sipin budget in remh ding zong a si ko nain sianginn area chung a si tikah harnak tete zong a um. Cucaah hmundang a rem deuh nak tu kan kawl mi a si,” tiah Pu Cin Lam Khai nih nih The Hakha Post ah a chim.
Khuacuannak (View Point) hmunhma thar hi Rih tidil a hnu lei tlangcung No. 1 sang ah hmunhma thar kan tuah ding mi a si. Khuacuannak tuah ding ah Chinramkulh khualtlawnnak kong riantuantu committee RE budget in tuah ding timhtuah a si. Atu dirhmun ah budget a tla rih lo nain caan kar lak khuacuannak view point hmunhma a ngah khawh nak le hmanthlak nak zong a rem khawh nak hnga cozah zung kip cio i bawm in kan tuah lai,” tiah Pu Cin Lam Khai nih a chim.
Rih tidil hi Chinramkulh i zohchunhtlak hmunhma paphat a si. Tipi in (Sea Level) pe 2900 a san nak hmun tlang cung ah a um mi thinlung muisam a cuang mi tidil (Rih) a si.
