Kan tleirawl lio ah thing-ah cawleeng in kan hnuuk tawn. Kei cu leeng a hnuuk mi caw fung tuk ka sia a rem tawn lo. Ka zoh hna ah rethei tuk in an hnuh kha ka hmuh hna ca ah fung in ka tu hna lo i ka huamsam ngai. Ka hawile nih “Na caw cu hnawh deuh hna, fung in na tuk hna lo ahcun an ngawn lai i, an fuum thai lai” an ka ti.Ka hawile cu an caw kha putput in an tuk hna i an rang deuh ngai. Ka lung ah a hung chuak mi cu thazaang um-ek in le thabaa tak in rian a tuan lio tu fung in kan hei tuk leen hna, rian a tuan lo mi satil vial fung tuk an hei tong leem lo, ka ti i ka lung a nuam lo ngai tawn.
Tleicia kan pa Rev. James Tial Dum nih Bible sianginn kan dih lai ah bia a rak kan cah mi cu : Atu cu siangngakchia nan si, thaizing cun pastor nan si cang lai ca ah mi nih an ka thangthat caan cu a dih cang ti hngal uh. Khrihfabu le Pathian ca rian a tuan mi nan si cang lai caah thangchiatnak le soiselnak nih a ka zulh cang lai, ti i hngal uh. Nan hruk-aih a chiat deuh ah an in soi hna lai, a that deuh ah kan thawh mi tangka in dawhawh an icawk i theu zuar in an um khih,an in ti hna lai.Innlo rian na tuan deuh ah a duh faak tuk, Khrihfabu zawn ruat lo in an in ti hna lai, tuan lo in na um ahcun a thathu an in ti hna lai. Cu ti nan ton tik ah“Mi dang ca rian a tuan mi poh cu soisel le thangchiatnak in phung a si ko, a tuan lo mi cu kong caih an tong ballo” ti kha zeitik hmanh ah philh hlah uh, a rak ti.
Profet Jeremiah nih “Lungthin hi zeizong vialte nakin a zer bik, Aho nih dah minung lungthin hi a hngalh khawh lai? Damh khawh ti lo tiang in a zaw cang” (Jer. 17:9) a ti. Pastor, Khrihfa upa, khuabawi le Hluttaw Palai etc… hna cu kanmah duh tein mi tam deuh hnatlaknak in thim an si. Miphun dang le khuadang nih thimpiak mi kan silo, kanmah duh tein kan thim mi hna an si ko. An tuan hlan ahcun kan zumh hna , kan i bochan hna i an thatnak lawng te kan chim. Asinain rian an hun tuan taktak tik ah mizapi ca rian a tuan mi an si bantuk in kan duh ning kan i lo cio hna lo. Mizapi ca ah a tha lai an ti i an tuan tik ah ka duh lo ning a si ahcun le ka halmi a ka pek lo tik ah a soiseltu, a thangchiattu le a dohtu ah kan i cang than.Pathian hmanh nih kan duh mi poh a kan pe in a kan tuahpiak lo. Kan pe sehlaw vawlei cung ahhin minung hmanh kan um ti men hnga lo, kan duh mi aa lawh cio lo ca ah. Mi cheukhat cu Pathian cung hmanh ah a vuivai mi kan um.Minung chinchin cu hruaitu le mi zapi ca riantuan i timh cangka in soi ding le thangchiat ding hi cu i ruah cia ding a si. Asinain kan rian tuannak ah ningcang te le dirhmun ngei tein le teimak chuah in tuan i timh ve ding a si.
Kan ram sersiam, thancho khawh nakding ah hruaitu le hruaimi dirhmun le sining i theithiam bu tein i pehtlaih le rian tuanti lawng ah kan sining kan i thleng kho lai. Zapi zong nih kan theih ve ding mi cu hruaitu pohpoh hi anmah le an khaap ning in mi ca ah rian a tuan mi lawngte an si ti i fian a hau. Hruaitu nih khua le ram ca ah thadi rethei ngai le thluak faak ngai in an i tuan sek leen zong ah tuan lio mi thangthatnak co cu a har hringhran. Tleicia kan pa Rev. Dr. David Van Bik nih “Laimi cu nun lio pangpar kual pek cu kan i harh tuk nain thih hnu pangpar kual pek cu kan i fawihte” a rak ti.
Cucaah Khrihfabu le khua le ram ca ah rian a tuan mi poh nih “Rian a tuan lio mi satil cu fung tuk aa huah tawn bantuk in fung in an in tuk mi hna le lung in an in cheh mi hna kha thazaang laaknak ah hmang u law kan ram sersiamtu le thanchotertu ah Pathian nih in hmang ko hna seh. Teitu kan ti mi hna cu zei tik caan hmanh ah a lung a dong lo mi an si.
