Chin Ramkulh, Hakha khuapi Pyidawtha sang chung ah inn hmai tiang motor luhter a duh ruang ah hmun an i cuh i, Chin Ramkulh Cozah Cabinet tiang an chuahpi nain, nihin tiang dik le fel in a phi a chuak kho rih lo tiah theih a si.
Atu hmun an i cuh mi kong he pehtlai in Chin Ramkulh Cozah Lutlai Minister le Cozah rian ngei dangdang hna nih voi hnih tiang a hmun ah kal in zohfelnak an va tuah ko nain, nihin tiang a phi an chuahter kho rih lo.
Hi kong he pehtlai in innhmun a ngeitu Pi Tial Ki nih, “2020 May ah Pi Aye Myint Khaing, Pu Ral Lian, Pi Biak Iang, Pu Sang Cung, Pi Renh Nawn le Pi Ca Hlawn hna nih Chief Minister, Minister dihlak le Sipin sin ah a kan report. Sipin nih May 27 ah a kana uh. Hi a kan auhnak ah kan inn License le gram pawl an zoh dih. Hi tan ah lungdai tein kan tin ko nain nihin tiang a dih kho lo. 2020 June 3 ah Sipin minister, lamsul lei minister, upadi bawizik le vawlei hmun lei ah rian ngei hna nih an rak zoh. A thaizing ah vawlei an tah dih i, theihnak zong an tuah dih ko. Kan konglam hi cabinet tiang an kaipi i an caih. 2021 January 7 ahkhan a voi hnihnak an rak zoh than i,thil dik ning tein kan in leh hna lai tiah an kan ti. Hihi kan i ruahchan bik mi a si ko. Hi inn hi 1992 kum in kan cawk mi a si. Zeitik hmanh ah innhmun chappiak ding zong kan sok bal lo. Lam area ti tik ah Pi Ca Hlawn le kan inn karlak ah pe 6, cun Pi Biak Zi inn le kan in karlak ah pe 8 tluk hi a ummi a si. Atu kong ahhin kan upa le kan hruaitu hna nih thil dik an i tanpi ko lai ti hi kan i ruah bik mi a si ko,” tiah The Hakha Post ah a chim.
Hi kong he pehtlai in The Hakha Post nih Pi Aye Myint Khaing te sin ah pehtlaihnak kan tuah nain, kan in let kho hna lai lo tiah an kan leh.
Cozah lei chimphuannak nawlngeitu Minister Pu Soe Htet nih, “Hi an hmun kong ahhin rian ngeitu kan dihlak tling tein voi hnih tiang a hmun ah zohfelnak kan va tuah cang. Buainak hi cu a bik in inn karlak lam kong a si. Atu hmun a ngeitu hna hi U Kyaw Nyein te an si. Hluttaw lei nih khuachung thancho nakding ca ah tiin inn karlak lam tuah nakding suaisam a si. Hi hmun inn karlak lam tuah ding kong ah a hmun i a ummi minung 6 nih a voi khatnak report an rak tuah. Cun, a voi hnihnak ah minung 60 leeng nih an rak tuah. Inn hmun a ngeitu lei zong nih lam kan tuah lai ti le cangka in innhmun an chunh ve. Hi kong ahhin innhmun lei rian ngeitu hna leikap nih zeitindah an tuahpiak hna ti hi tha tein zohfelnak kan tuah than lai,” tiah The Hakha Post ah a chim.
Cun, lam chunh a duh mi lei hna nih an i tlaih bik mi cu, “inn a kang lai lo ti chim khawh a si lo. A kangh sual ahcun meithat motor luh a herh lai. Hi bantuk caan ah motor lam a um lo a si ahcun harnak a tong kho mi a si tihi an i tlaih bik. Cun, Cabinet tiang kan phaknak zong hi buainak a chuah tik ah pawngkam minung a hnursuan dih sual hna lai ti kan phan ca ah a si,” tiah Minister Pu Soe Htet nih a chimchap.
Pi Aye Myint Khaing hi atu lio Chin Ramkulh, Hluttaw Speaker Pu Zo Bawi thaisung nu i a u a si tiah kan theih.
