By: Salai KB Thawng
Biahmaithi
Democratic Voice of Burma (DVB) Broadcasting Media nih 2018 March 21 (chunlai) ah, “Myanmar ram President U Htin Kyaw cu President sinak in a rian a chuahtaak cang,” tiah a hun thanh. Hihi mizapi kan lau bantuk in DVB nih i palh sual in a thanh mi a si hnga maw, tiah a ruat mi zong kan um lai. Asinain, President Zung in Chimphuannak Nawlngeitu U Zaw Htay bia cherhchan in an tial mi a si tik ah zumhlo awk a tha lo mi a si—a fiang ko, a rian a chuahtaak taktak cang. Chin Ramkulh Hluttaw Chairman Pu Zo Bawi zong nih, “Atunaite kha an hun ka chawnh ve i President U Htin Kyaw hi a ngandamlonak ruang ah President in aa dinh hi a si lai,” tiah a ka chimh.
Pu Van Thio President a tlin khawhnak lam a um
Ka tlangtaar bantuk in, “Pu Henry Van Thio hi President a si kho lai maw?” ti hi a si. Kei cu ka zumh ngai. Amah belte, kan Lai phungthluk ah, “Saduhthat al chiat,” ti a um bantuk in hi ka tial ning in thil a tlamtlinlo sual tik ah, “Naa palh cikcek,” ti khawh cu a si lai lo. Hihi 2008 Phunghram ning in zoh tik ah Phunghram caangrelnak 73 (b,c,d,e,f) ning in a tling kho ngai mi a si. President i thlennak le thim thannak kong ah Phunghram caangrelnak 73 ning ah caangthen a,b,c, d,e,f,g, tiang a um nain b, c, d, e, f, tiang lawng ka langhter. A tanglei ah a ruang kan fianter than te lai. Pu Van Thio President a tlin khawh nakding lam cu a tanglei 2008 Phunghram kan langhter mi ning in zoh khawh a si.
Pu Henry Van Thio hi Myanmar ram Ruahnakpetu Daw Aung San Suu Kyi zong nih a zumh i aa bochan mi a si, ti cu mizapi hngalh a si. UN General Assembly meeting hmanh ah Myanmar ram ai-awh in a kalter ti khawh a si.
Pyidaungsu Hluttaw nih an ceih ko lai. Asinain, Daw Aung San Suu Kyi nih Pu Henry Van Thio hi a mizumh a si bantuk in chuahpi sehlaw an al ngam bal lai lo. Cun, Vice President-1 U Myint Swe nakin Pu Henry Van Thio cu a min zong a lang deuh ngaingai.
2008 Phunghram caangrelnak 73 le caangthen pawl hun zoh ta usih!
73. (b) Rampi President hmunhma a lawn sual i Pyidaungsu Hluttaw meeting caan he aa ton lio a si ahcun President nih aa dinhnak kong Hluttaw tuanvo ngeitu sin ah tuan tein a chimh hrimhrim lai i ni sarih chung ah a thim lai. (b) If the office of the President becomes vacant when the Pyidaungsu Hluttaw is in session, the Acting President shall promptly intimate the Head of the Pyidaungsu Hluttaw to fill the vacancy within seven days.
73. (c) President hmunhma a lawn kha Pyidaungsu Hluttaw nih an theih lecangka Vice President ding ah minung pakhat a thim lai. (c) On receipt of the intimation from the Acting President, the Head of the Pyidaungsu Hluttaw shall proceed to elect a Vice-President by the group of Hluttaw representatives concerned that initially elected the Vice-President who subsequently got elected President, the office now being vacant.
73. (d) Vice President thar pakhat an thim dih tik ah President Thimtu Phu nih Vice President pathum chung ah minung pakhat cu President ah a thim lai. (d) After the group of representatives of Hluttaw concerned has elected a Vice-President, the Electoral College comprising all the Pyidaungsu Hluttaw representatives shall elect the President from among the three Vice-Presidents.
73. (e) Pyidaungsu Hluttaw meeting caan he aa ton lo ahcun Hluttaw tuanvo ngeitu nih ni 21 chung ah meeting a auh lai i President thimnak a tuah lai. (e) If the office of a Vice-President becomes vacant when the Pyidaungsu Hluttaw is not in session, the Head of Pyidaungsu Hluttaw shall summon the Pyidaungsu Hluttaw within 21 days from the day of receipt of the intimation from the Acting President and proceed to hold election to fill the vacant office of the President in accord with the above procedure.
Pu Henry Van Thio President a tlin khawh lo nakding lam
Hihi kan pa Pu Richard Zatu ka hal i hitihin a ka leh. “President U Htin Kyaw hi Pyithu Hluttaw nih nominate mi a si tik ah amah zaka kha thim a si lai. Cucaah, Pyidaungsu Pyithu Hluttaw nih anmah chung lila khan an thim ko lai ca ah thim thar mi kha President a tling te lai. Pu Van Thio le U Myint Swe hi an tling kho lai lo. Cun, Chin miphun kan si ruang ah Pu Van Thio hi President an pek lai ka zum lo,” tiah a ka chimh.
Hihi ruah awk ngaingai a si. Cu hlan Myanmar ram tuanbia kan zoh khawhtawk ah Chinmi hi a lu le baan kan phanh khawh mi a tlawm ngaingai. Tlangcungmi kan si pin ah Chinmi kan si i Kawlmi nih hin an kan zenh ziar i an kan nehsawh fawn i, an kan pheo peng ti cu mizapi hngalh a si ko.
President thim ning phunglam
A cunglei President thimnak Phunghram ah kan langhter bantuk in Vice-President pahnih an um i Vice-1 nih caankar chung cu President a tlaih ko lai. Asinain, 2008 Phunghram bantuk in Hluttaw nih minung pakhat an thim mi le Vice-President pahnih kha (an pathum) President ah thim an si lai. Thim thar ding ah chuahpi chung mi le zumh mi hna hi: U Win Myint, Dr. Zaw Myint Maung, Dr. Tin Myo Win, Thura U Shwe Mann, U Phyo Min Thein, Daw Su Su Win, U Win Hlaing le mi dangdang hna an si. Hi hna pawl chung ah minung pakhat kha thim a si lai i atu Vice-President pahnih he zuamter in thim an si te lai.
Zeiruang ah dah U Htin Kyaw le U Win Myint an rian in an chuah hnga?
President U Htin Kyaw hi a ngandamlo ngai mi a si, tiah kan theih tawn. Bangkok zong ah aa thlop lengmang mi a si, tiah kan theih. President Zung Chimphuannak Nawlngeitu U Zaw Htay nih DVB sin ah, “A ngandam ko, amah nih i dinh a duh ca ah aa din mi a si,” tiah a chim.
Catialtu kei cu ka lung a hring. U Htin Kyaw hi a ngandamlonak ruang ah aa dinh mi zong a si kho bak mi a si. Cun, Daw Aung San Suu Kyi ruang zong ah a si kho ngai ve. NLD Cozah a kaika ah, “President cung ah ka um lai,” tiah Daw Aung San Suu Kyi nih a rak chim bal bantuk in a um taktak i President hi a lang lo. Pasal cio, rampi pakhat lutlai nih a nawlngeihnak a tlawm tuk hen cu. Amah duhning in rian a tuan khawh mi a tlawm tuk hen cu. Presidential ti mi President hruainak in ram kan hruai lai ti lio i President cung i nawlngeihnak a ngeitu um peng ahcun aho nih dah an tuan zuam cio hnga?
Cun, nizaan naihrawng ah Daw Aung San Suu Kyi cu Rakhine ram buainak kong ah upatnak an pek mi laksawng tam-ial an chuh cang. Ramchung buaibainak hmanh a daihter kho lo mi Daihnak Laksawng hna pek hi aa tlak lo, an ti lengmang tik ah an zumhraihnak a zor ngaingai cang ti zong a lang.
Cun, Pyidaungsu Pyithu Hluttaw Chairman U Win Myint zong President U Htin Kyaw nih kaa din lai, a ti lecangka aa dinh ve mi tu hi cu phundang ngai ah ka ruah. President he zeimaw zeimaw i pehtlaihnak ngei hna sehlaw ka lawhter. A ruang cu U Win Myint hi President aa cuh kho ding dirhmun a si ve ca ah a si ko. A cunglei ah kan chim cang bantuk in, U Htin Kyaw aa dinh tik ah minung pakhat cu thim in Vice-President pathum lak ah minung pakhat cu President ah thim a si lai ca ah a si ko.
Zeiruang ah dah an rian in an i dinh hnga, ka ti bantuk in, NLD Cozah nih democracy phung chung ah an kan kalpi len ko nain Ralkap nawlngeihnak a dih kho taktak lo. Phungphai ning in President thim a si nain nawlngeihnak tling a ngeih lo tik ah minung sinak cio ah diriamhnak a ngeih lo bia a si kho. Cun, a ngandamlonak ruang zong ah a si kho fawn ko.
Biadonghnak
Aho nih President an va tuan ding hmanh ah 2018 March 21 cu NLD Cozah nih Myanmar ram tuanbia cahmai pakhat an tial ni tluk a si ve. President aa dinhnak a ruang a tampi ko lai. A damlo ruang ah maw, amah pumpak lungdongh ruang ah maw, asiloah temtawntu thil tete a um ruang ah maw, ti cu kan hngal kho lo. Pu Henry Van Thio hi President a tling kho i, U Win Myint zong a tling kho i, cun an thim thar ding mi minung zong hi President a tling kho ve thiamthiam.###
