COVID-19 zawtnak zohkhenh ding in sii-inn ah chiah mi President Donald Trump cu a ngandamnak, thatlei a panh cang ca ah sii-inn in a chuak i, a umnak White House pi ah a kir than cang tiah theih a si.
COVID-19 zawtnak a ngei mi kong he pehtlai in President pa i a siibawi Dr. Sean Conley nih, “President ih a taksa linhsat a um lonak suimilaam 72 chung a si cang. Cun, a thaw chuah ning le a dangdang zong hi a hlan bantuk a si cang. Damnak hi tling in a hmu rih lo nain President inn lei a kir khawh than ding hi a biapi mi a si ca ah, kanmah leikap zong in a tha bik in kan tuaktanpiak i atu bantuk in kan kirter than hi a si. White House zong ah ngandamnak lei thiamsang pawl nih caantling in zohkhenh a si riah lai,” tiah October 5 zinglei sang Press Conference an tuahnak ah a chim.
President COVID-19 zawtnak a ngeih hnu, a zohkhenh tu sii lei thaimsang hna nih Press Conference an tuah hlan deuh, American caan cawnnikhat ni suimilaam 6:00PM tluk ah President Trump sii-inn in chuahter a si lai tiah mizapi sin ah theihternak an tuah.
President an zohkhenh ning le an thlop ning kong he pehtlai in, an zohkhenhnak ralkap sii-inn a si mi Walter Reed sii-inn hmai ah Dr. Brain Garibaldi nih a tanglei bantuk in mizapi sin ah a fianter.
“President hi Remdesivir timi sii in ni 5 chung thlop ding a si. Cawnnikhat kha a voi linak sii pek a si i, a voi nganak tu hi cu innlei ah pek than a si lai,” tiah fianternak a tuah.
President Trump hi a liam cia October 2 ahkhan zawtnak hmuh a si i, zawtnak a hmuh a si le cangka a thaizing in sii-inn ah zohkhenh colh a si. (Ref/VOA)
