By: Parthlam
Minung pakhat le pakhat kan i pehtlaihnak ah a biapi bik mi pakhat cu BIA a si. Chimmi bia nih pakhat le pakhat kan duh mi, kan lungput le sining a kan theihter. Vawlei ser hlan ah Bia a um cang. Pathian nih zeizong vialte hi cu BIA thawng cun a ser. BIA thawng loin sermi zeihmanh a um lo. Bia cu nunnak hram a si (Jn. 1:1-4).
Laimi kan pipu sining le dirhmun cuanh tikah ca thiam lo, hmuhtheihnak a der mi an si. Lam thathi zong a rak um lo caah khual lamhla zong an rak tlawng kho lo. Asinain an lungput le an dirhmun ruah tikah nihin Laimi kan lungput le sining he cun kan i hlaat ngaingai. Ruah setmat tein bia an rak chim caah an bia chimmi hmual a ngei i an bia ah raltha tein an rak dir ngam. I phelh an hmang lo.Cutin an lungput le dirhmun a rak si caah “Pasal, ka bia le ka tlah tem” ti bia zong an rak i nunpinak cu a si.
Hebru (Israel) mi le Laimi kan lungput a rak i lawhnak pakhat a si mi cu BIA sining kan rak ruah ning ah a si. Catialtu pakhat nih cun: Hebru mi hi bia tam an chim lo. An biafang zong a tlawm. Biafang hman mi hi thong hra hmanh a tling lo. Greek cu an biafang hi sing hnih hrawng an ngei,a ti. Bia ahhin nunnak le thihnak, thluachuah le vanchiatnak a um, tiah an ruah. Bia kan chim mi hi a lotlau kho lo, a va chok i kan sin ah a rak kir than, tiah an ruah. Cu bantuk in Laimi kan pupa zong nih an rak ruah ve. Minung pakhat nih midang thangchiatnak chim a timh ahcun a pawng ummi nih “Ai, sanglai innka ah fawh a dir” an ti hnu ahcun peh ngam a si ti lo. Zei ruang ah ti ahcun midang thangchiatnak na chim mi kha na kuung ah a tlung kho ve cuh, chim hlah,ti khi a si. Mihrut nawlcawn le mi dawhlo soi zong an rak duh lo. Mah kuung ah a tlung, kan ti hna ning tein kan tefa sin ah a kir than, tiah an rak ruah.
Laimi kan pipu hna cu an ding, an fel, zumh awk an tlaak tiah ti an tonnak cu an khuaruah ning lungput, an biachim holhrel le an thil tuah ning ruang ah a si, kan ti khawh. Mi leirawi, thangchiat, soisel le lihchim an rak duh lo. Biakam leet zong an rak duh lo. Lih chim a hmang mi cu khua upa le hruaitu ah tuanvo khinh an rak duh hna lo. Bia a chim tik zong ah “Anih bia le khuasik mang tham cu” tiah an zumhlo ning langhternak ah an rak ti tawn hna. Biakam leet a hmang mi hrimhrim cu zeihmanh ah an rak rel hna lo.
Tuchan Laimi kan sining lungput le dirhmun zoh tikah Laimi kan kokek lungput le sining a tlau dih deng cang rua, tiah ka ruah. Ram ca rian tuan aa tim mi zong nih mee pek sawmnak ahcun “Mee nan ka pek ahcun cukan tuahpiak hna lai, kha kan tuahpiak hna lai” tiah bia a phunphun kamh a si. Asinain a tlin tikah tuahpiak nemmam cu an mui hmuh le ton hmanh an har cang. Biaknak rian tuan mi cheukhat zong nih pulpit tlang cun : dawtnak, remnak,zaangfahnak, toidornak, dinfelnak … cu chet tiah i au seek a si nain member nih biakinn chung dah tilo a leeng ah hmuh a har mi zong kan um hoi. Zung i leen hmanh ah vawlei lei bawi aa lawhter mi zong um a si hoi. Facebook chung comment le ca tial mi rel tik ah “Ka pi ka ningti” ti awk tlaak tihnung catial a tam hoi. Kha ti ca a tialtu kha khrihfa a si maw, ti ahcun khrihfa lawngte an si hoi. Bible hmu ballo, aa pum ballo le thlacam ballo kan lo hoi. Lih chim kho le minung hawi bia faak in a ti ngam mi ko hna kan upat hoi hna.
Kan pupa cu an bia an dirpi langhternak ah “Vomkhuai a neh in thi, pasal a bia in thi,”ti zungthluk zong an rak ngei. Pasal, ka bia cu ka dirpi awk a si, an rak ti caah “Pasal, ka bia le ka tlah tem” ti bia zong an rak ngei. Chimmi bia hi biapi tuk i an ruah caah “Bia ka khat siapi man” an rak ti. Tuchan Laimi nih kan pipu lungput le dirhmun kawl than in dirpi khawh i zuam cang usih. Pasal, ka bia le ka tlah tem.
