Ralzaam minung 10,000 fai an i dornak thlanglei Laitlang Paletwa khuapi chung ah COVID-19 zawtnak ngei hmuhchap an si i nihin tiang zawtnak ngei minung 8 an si cang tiah thawng kan theih.
Myanmar ram chung, COVID-19 zawtnak a karhnak ah lamsul lei thatlonak le, thanchonak a nuar cemmi Chin Ramkulh Paletwa ah zawtnak ngei hmuhchap a si ca ah khuami hna lungrethei in an um. Atu mizaw thar aa chap mi hna hi Rakhine in a tlung mi an si i, zawtnak an chek hna nak ah atu bantuk zawtnak hmuh an si.
Hi kong he pehtlai in Paletwa sii-inn uk Dr. Soe Thet nih, “Atu zawtnak hmuhchap mi hna hi 2020 November 26 le 29 ah Rakhine ram in a rak tlung mi an si. Paletwa an phakle cangka in Quarantine ah an umter colh hna i ni thum an um hnu ah zawtnak hmuh an si,” tiah The Hakha Post ah a chim.
November thla chung lawng ah zawtnak ngei hmuh a si mi Paletwa khuapi ah zawtnak aa chap hi nizaan tihni lawng in a si. Zawtnak ngei an i chap tik ah khuami hna zong an lungretheihnak a zual chin tiah khuami pakhat sin in thawng kan theih.
Khuami pakhat nih, “Paletwa hi internet line a that lo ca ah a dang peng nakin COVID-19 kong ahhin cun chimh cawnpiaknak lei zong kan chambau ngaingai. Online lei ah a muih in an kan muihter tik ah kan ca ah a har ngai ko. COVID-19 timi hi zeitindah an i chawnh, zeitindah a karh ti zong kan thei bak lo. Zawtnak hmuhchap lengmang an si tik ah kan lungre cu a thei bak ko,” tiah The Hakha Post ah a chim.
Paletwa khuapi chung ahhin 2020 November 19 ah minung 4, November 26 ah minung pakhat, November 29 ah minung 3, dihlak fonh zawtnak hmuh mi minung 8 an si cang tiah theih a si.
Hi minung 8 chung ah 2020 November 19 i hmuh mi minung pali hna cu damnak an hmu than cang i, sii-inn in an chuahter hna. Atu Paletwa ah COVID-19 zawtnak ngei minung pali an taang, cun Quarantine a ummi minung 37 an si tiah kan theih.
