Myanmar rampi thimnak a dih hnu, teitu party pakhat nih cozah an tlaih tikah mizapi nih ruahchan mi pakhat cu 2008 phunghrampi remh khawh ding mi a si tiah kan theih.
Phunghrampi remh ding a fawi mi a si rih lo nain tutan Myamar rampi thimnak a dih hnu NLD party nih teinak an hmuh caah cozah an ser khawh than lai, cucaah NLD party nih cozah an tlaih than lai i phunghram an remh kho hnga maw timi kong ah Minister Pu Sui Thio nih “NLD nih kum 5 an tlaihthan ding mi ah hin phunghrampi hi an remh khawh ko lai tiah ka zumh. Federal Pyitaungsu zong kan hmuh khawh te ko lai. 2008 phunghrampi zong hi kan remh khawh te ko lai. A ruang cu Hluttaw lam (line) in kal ahcun remh khawh nakding a lam a um lo, Hluttaw lam cu zatuak 75% cung hmuh lawngah remhkhawh si lai, ti a si caah a lam um lo. Asinain NCA lam (line) in an kal tik ah hma a kal tuk cang. Fiang deuh in chim ahcun Federal timi lam cung a phan cang (lam cung ah a bok cang, van thawhter i ding tein kalter ding lawng a taang cang). Ralkap zong nih Federal cu an cohlan cang, tiah The Hakha Post ah a chim.
2008 phunghrampi remhding siseh, Federal kong siseh, a luancia kum 20 tluk ahcun federal timi min kong chim ahcun thong tlak ding kha a rak si ko. Zei ruangah ti ahcun ralkap nih a rak duh lo, thencheunak ah an ruah caah a si. Nain, atu ahcun federal zong cu an cohlan cang, tiah kan theih.
