Rampi President, Rampi ruahnak petu Daw Aung San Suu Kyi telh in NLD party Hluttaw Palai dihlak le Party Cozah chungtel dihlak hna i thlahlawh chung in zatuak 25% cu party fund ah an chiah dih lai tiah theih a si.
Thimnak ah teinak a hmu mi NLD Hluttaw Palai dihlak le Party chungtel Cozah riantuan dihlak hna i thlahlawh zatuak 25% cu party fund caah an chiahter hna hi a liamcia kum 2016 in an rak thok mi a si i, 2020 kum thimnak a dih hnu zong ah a hlan i an rak chiah ning bantuk in an chiah rih hna lai tiah theih a si.
Hi kong he pehtlai in 2020 kum Myanmar ram thimnak ah Hakha Peng, Pyithu Hluttaw ah aa zuam i teinak a hmu mi Pu Tial Ling nih, “Thlahlawh hmuh mi chung in zatuak 25% hi Party fund ah chiah a rak si tawn. Tutan zong hi chiah than ding a si. Thlahlawh zatuak 25% hi thla khat voi khat chiah peng ding a si. NLD a si ko ahcun Chief Minister le Minister pohpoh nih an chiah dih lai. Amah belte sawm chom le kawh-auh chom in party dang Minister a tuan mi tu hi cu an i tel lai lo,” tiah The Hakha Post ah a chim.
NLD Party Chairman, rampi ruahnak petu Daw Aung San Suu Kyi, Vice Chairman, atu rampi President a tuan lio mi U Win Myint hna telh in thimnak ah teinak a hmu mi Hluttaw Palai hna le party chungtel Cozah rian a tuanmi dihlak hna nih an thlahlawh chung in zatuak 25% party fund ah chiah dih ding ti hi 2015 kum lio tein phung ah an ser mi a rak si.
Cun, atu bantuk in thlahlawh zatuak 25% an chiah mi kong he pehtlai in, “A bik in NLD party hi cu mizapi dirpinak in a dirmi party kan si. Hmun cheukhat ah party zung hlannak tangka ngei lo mi an um. Cun, riantuannak zong ah tluangtlam in a kal khawh lo caan zong a um. Cu a si ca ah, zungkhan hlannak, riantuan a tluantlam khawh nakhnga ca ah tiin atu bantuk in kan chiahter mi hna hi a si. A fawinak in chim ahcun thlahlawh a ei mi Hluttaw Palai hna nih party an bawmh than ti khawh a si,” tiah NLD CEC chungtel Dr. Myo Ngyunt nih a chim.
2015 kum thimnak a dih hnu NLD in Amyotha Hluttaw, Pyithu Hluttaw le Ramthen (or) Ramkulh Hluttaw Palai dihlak fonh minung 886 le party chungtel Cozah riantuan hna nih fund an chiah mi tangka dihlak sing 2,000 leeng a si. Atu bantuk in fund an chiah mi dihlak hi kum nga chung ah party fund Kyats 12 Billion fai a si.
Pyithu Hluttaw le Amyotha Hluttaw Palai hna hi thla khat thlahlawh sing 10 a si i, Ramkulh le Ramthen chung in Hluttaw Palai hna hi thla khat ah sing 5 an ngah. Ramkulh le Ramthen Hluttaw Palai hna hi zatuak 25% chiahter an si nain, minung pakhat ah sing 1 cio in an chiahter hna. 2020 kum thimnak ah aa zuam mi NLD Hluttaw Palai minung 1,104 an si i, an dihlak in party nih minung pakhat ah sing 10 cio bawmhnak a pek hna tiah theih a si.
Photo/ Internet
