By – Pa Pui
American President Donald Trump nih thimnak i a chuah hlan ah “kei cu American President nan ka thim ahcun Mexico he kan ramri khi hau ka sak lai” tiah rammi a kamh hna. Party dang le rammi tampi nih an soisel len nain thuul lo in a khamchih tualmaal ko, zeicatiah amah pumpak ca si lo in American ram a himnak ca ah a tha lai tiah a ruah ca ah a si.
Cu ve bantuk in nihin Chin ramkulh cozah nih cozah an tlaih ka tein “kan caan chung ah Hakha khualipi khuatungvaang kan kauh lai i kan thanchoter lai i kan dawhter. Hakha khua kan kauh lai i pupa ram ti zong a um lai lo” ti in an i hmaithlak. Khuami a bik in pupa ram a ngei mi le hmun ngei pawl nih voi tampi lamzawh tiang in an doh hna nain nihin tiang an thuul lo. “Cozah upadi phung ning tein khua le ram thanchonak ca ah pehzulh in kan kalpi ko lai,” tiah media in siseh, khuami he tonnak an ngeihnak ah siseh, an chim peng.
Cuti cun nihin tiang Hakha khuatungvaang cu nichuah nitlaak lei he an kauh cuahmah. An dirhmun zoh ah cozah pakhat dirhmun in ralthatnak an ngeih mi zong a lang. Khuatungvaang an kauh ningcang le pupa ram le hmun ngei pawl he an soinawl ningcang tu cu zapi hmuh le theih cio an si. Hi kong ah nihin Chin ramkulh cozah an dik i khuami le ram ngei pawl an palh ti duhnak a si lo. Chim duh mi cu Cozah a tlai lio mi nih khua le ram thatnak ca ah a biapi tuk, a herh tuk tiah a ruah mi cu raltha tein an tuan le an kalpi awk a si ko.
Nihin Hakha khuatungvaang kauhnak kong ah khuami le Chin cozah lung i hmuthiam lo in harnak kan ton mi hi a ngaingai ti ahcun ralkap cozah nih a kan chiahta mi uknak chia theipaar kan zuun mi a si. Ti an noih mi a fim kho rih lo mi a si. Faktuk in kanmah le kanmah kan i ti lo le kan i siamremh khawh ah a tha. Zeicatiah khuatungvaang kauh le Hakha khua dawhter ding rian hi cozah lawng si lo in khuami le ram ngei pawl zong nih an duh mi le an ruah khawh mi a si ko lai.
Fiang deuh in kan chim ahcun Ralkap cozah chan tuanvo ngei riantuantu hna nih ningcang lo in hmun an zuar le an pek hna ruang ah a si ko. Cozah palh dih le hmun ngei khuami palh dih zong ah chiah dih awk a tha lo. Zeicatiah hmun ka ngei a ti mi pawl zong khi tuanvo ngei cheukhat nih an rak pek ve mi hna an si tik ah van chuh ding ah an sian ve lo mi zong cu an mawh ve lo. Zeica tiah cozah tuanvo ngei cheukhat kut lila in hmun ngeihnak nawl aa tlaih mi zong an um ve i cucu cozah nih chuh a timh lila than tik ah sullam a ngei lo ngai ve.
Cu ve bantuk in Cozah nih khuatungvaang kan kauh lai i kan dawther lai an ti mi zong cu zeitluk in dah khuami kan ca ah a that ve. Kan herh tuk mi a si. Asinain khuami he buaibai le thangchiat kan zuam lo, ti in Cozah nih hi Hakha khuatungvaang kauh ding rian hi ngol hna sehlaw Hakha khuapi cu, hlan ralkap cozah chan bantuk in khuakam vialte cu lam zong ningcang tein pemh awk tha lo le ningcang lo in an um dih lai. Cu tik ah Hakha khuapi cu ningcang tlai lo zohchia ngai khualipi ah aa chiah ve hnga. Cucu nihin loram ngei pawl zong nih a thar le fak deuh in kan ruah ah a tha tiah ka ruah.
Kei cu Hakha khualipi hi vawlei cung tlangcung khua lakah khua dawh le khua nuam bik khualipi pakhat si kho ding in tuah usih ti ka duh. A herh ahcun khuapawng kam sak rih lo mi hmun le ram lawng si lo in khuachung ah khualipi dirhmun he aa tlak lo mi le khuapi a chiatchuahtu aho kan inn cio zong hi cozah nih raltha tein kan remhpiak hna sehlaw ka duh. Ka pom i ka cohlan khawh fawn hnga. A ruang cu Chin miphun kan khualipi a si mi Hakha khua chan he aa tlaak in thancho le dawhter hi keimah pumpak thil nakin biapi ah ka chiah.
Asinain nihin Chin cozah nih Hakha khualipi khuatungvaang kauh nakding ah ral tha tein rian a tuan kan ti ko bu ah Hakha khuami le loram ngei pawl a soinawl ning hna le a chimhruah ningcang hna belte cu a chambau deuh rua hlah maw tiah ka ruah. Cozah nih pupa ram le hmun kong ah phung le lam a ngeih mi a um awk a si i cu cu cozah tuanvo ngeitu nih khuami sin ah cawnpiak le fianternak lei a chambau ca ah a si hnga maw? Zeicatiah cozah pi nih tha tein phung le lam a ngeih ko ahcun khuami zong nih cohlang lo in an doh lem hnga maw?
Raltha tein Cozah nih khuatungvaang kauh le raltha tein khuami nih pupa ram runven hi a zei deuh dah a biapi tinak in zeitin dah hi buainak hi a daih khawh lai ti mi tu hi biapi deuh in kan zapite ruat in a lam kawl ah a tha.#
