Democracy phung a kal lio mi ram ah ngunkhuai le budget umtuning hi zohfel a herh tuk mi a si. A ruang cu mizapi nawlngeihnak tampi a um cang. Hlanlio uknak cu cunglei nih tanglei pennak (Top-dawn) in nawlngeihnak a rak tam tuk. Democracy dothlennak thawng in atu cu mizapi nawlngeihnak na ngeih ve, ka ngeih ve hi kan i fian a herh cang.
Biatlang i “Ngunkhuai a karh” ka ti mi hi ngunkhuai kan pek mi aman (rate) a kai ka ti duhnak si loin kum khat hnu kum khat hmuh mi a karh (a tam deuh) chin lengmang ka ti duhnak a si. A ruang cu Inntung a karh, minung kan karh, dawr a karh hlei ah riantuan ning le pawcawmnak a karh a thancho ruang ah a si.
Khuapi pakhat chung ah Sipin ngunkhuai tampi pek a si ca ah zalampi, lamteng, luti luannak, dinti, thianhlimhnak, minung humhimnak, tlonlen nuamhnak le khuadawhnak vialte a thatnak a thanchonak le sersiamnak tuanvo a ngeitu cu municipal (Sipin committee) a si bantuk in mizapi ca ah tuanvo a ngeitu bik a si fawn.
Cucaah Sipin ngunkhuai pek mi cio zeizat, hmuh mi zeizat, kumfatin mizapi ca ah tuanpiak mi zeizat ti hi zapi nih theih le hngalh a herh. Hlanlio ahcun Myanmar ram khua dihlak ah zapi hmuh khawhnak lamton kip ah kum khat Sipinn ngunkhuai hmuh zat le tuahpiak khawh mi capital budget vialte zapi hmuh in tarpiak lengmang a rak si.
Chin Ramkulh chung Sipin ngunkhuai hmuh mi vailte Chin Ramkulh budget ah a lut dih i Chin Ramkulh income ah a lut dih mi a si. Myanmar ram Union cozah nih pek than mi vialte chung in Chin Ramkulh cozah nih khua kip phawtzamhnak tuah than a si. Sipin phunghram hrimhrim ah ngunkhuai pek khawh mi zohchih in pek a si zungzal. Tam deuh a pe kho mi cu tam deuh chap hrimhrim ding a si ve. Culo ahcun mizapi nih ngunkhuai pek duh ti loin cozah bawmhnak lawng bawh a si ko lai. Cu lawng si loin inntung le minung (Population) tlawmtam, khuachung zalampi le lamteng a tawisau, khua area a bitkauh vialte zohchih in phawtzamh thiam a biapi tuk.
Chin Ramkulh Sipin lutlai ka tuan lio 2017-2018 kum tiang cu khua a hmetngan le ngunkhuai pek khawh mi zohchun in ningcang tein budget kan rak suai i kan suai ning tein kan rak hmuh ve ko. Hakha khua ca ah 2017- 2018 kum capital budget hmuh mi 2821.798 million kyats a rak si. Cu hnu cu khum khat hnu kum khat a tum chin lengmang.
2017- 2018 kum ah Hakha khua ca ah kan rak hal khawh mi budget (capital) hi 2821.798 million kyats a si i khuachung zalampi le lamteng, luti luannak, lungrual a herhnak, humhimnak vialte zatceo tuah khawh a rak si. Atu 2019- 2020 kum kan zoh tik ah a kailei tu si loin a zorlei tu a si.
2019- 2020 kum, Hakha ca ah pek mi chung in Sangthar (676 acre) samhnak ca ah leiba cham ding 300.00 khuachung dinti phawtzamhnak a felfailo ca ah maimilhnak 220.0, Pine Sipin zungthar sak thannak ca ah 150.0, Bus Terminal concrete phahchapnak 200.0 kan zuh ahcun 694.29 lawnglawng a taang. Cu tangka cun khuachung lam lungphah ding 9160ft kataza phah ding 630ft concrete phah ding 770ft culvert tuah ding pa 1 lawng a si cang.
Hakha khuachung lam vialte a sau hi 240 km leng a si i Kalaymyo le Hakha kar lam nakin a sau deuh. Cu chung ah kataza le lungphah cu chim lo vawlei lam lawng a si rih mi hi a cheu naktam a taang rih.
Cu lawng si loin Hakha khuachung hi 2015 kum ah fak tuk in a rawk cang mi a si ca ah sersiam ding a herh mi a tam tuk rih.
Tuahlo a si kholo mi khuachung lam vialte remh ding, khuachung tivahor vialte kilvennak le luti luannak, Hakhathar 1,2, dinti a har tuk ca ah Zinghmuh tlang in dinti lakpiaknak, thlaanhmun kalnak hmun 5 lam vailte tharchuah ding, khuavel lam vialte remh ding, hmunthur thletnak lam pa 4 tharchuah le sersiam ding, Bus terminal lam luhchuahnak tuah ding le mei, ti, public zunzunnak tuah ding, Pump hau loin Sacuan, Fadeu, Kiar, Haucheuva le caparva tihna in dinti lak hrimhrim ding pawl hi a ran khawh chung tuahcolh a herh rih mi an si.
Budget a tlawm tuk ca ah thil hmete bantuk ah ruah mi lam mei a rawk mi tete remh ding, zapi zunzunnak tuahcia mi remh le thianh ding, khua luhnak signboard a rawk mi remh ding, lam minbunhcia mi signboard a tlu mi remh than ding, khua luhnak kip i aa phah mi hmunthur vialte thianh ding, khuachung zohdawh catar pawl a rawk mi remh ding, Pangparduum le khuacuanhnak remh ding, thingkung cin ding, zun-ek dopnak le hlonhnak tha tein hman le hlonh ding, hi vialte hmanh aa tuah kho lo i a chambau tuk ti cu zapi mithmuh a si ko.
Khuachung sersiamnak vialte Sipin nih a tuah lo ah aho nih dah a tuah lai? Cucaah Hakha khua in ngunkhuai pek khawh mi a tam bik a si bantuk in budget thlakpiak tik zong ah atu naktam deuh in (2017- 2018) kum i kan thlak mi nak tlawm loin pek hrimhrim a herh cang, tiah ka ruah. Chin Sate Parliament Speaker nih a ralai mi kum cu khuapi chung sersiamnak papek in kan ruah lai a ti ka theih i kan hna a ngam deuh. Cu lo ahcun hmailei ah Hakha khua kilvennak le humhimnak ca hmanh ah thinphang a si te lai.
Chin Ramkulh khua vialte cozah bawmh a herh mi lawngte kan si. Khuapi chung tuanvo a latu Sipin budget ah cun a khua hmetngan zoh hrimhrim in pek a herh. Cucaah nawlngeitu Chin Ramkulh cozah upa pawl thiamthiam bochan a si ko ca ah felfai deuh in ruah a herh zia ka langhter duh mi a si. Ngunkhuai a karh bantuk in budget thlakpiak mi zong a tam deuh ve awk a si.
Mizapi lei nih ngunkhuai pek khawh kan i zuam bantuk in sersiampiak le tuah tuanpiak than khawh a herh tuk ve mi a si.
Pu Thla Hre
Director (Rtd)
Chin State Development Affairs
