Nawi dam kong ah ram ngeitu lei in cozah nih mizapi sin ah thawng dik lo in a thanh mihi lo ngeitu lei in an lungtlin lo, tiah kan theih.
Nawi tiva kam ahhin lei le lo tuah in pawmcawmnak rian a tuan mi hi inndawng 14 an um i, cozah le lo ngei tu hna kar ah lungtlinnak tling an hmu rih lo tiah kan theih.
Hi kong he pehtlai in lo ngeitu pakhat nih “Cozah nih Nawi dam khamnakding caah inndawng 14 an um i, inndawng 10 cu an lungtling cang tiah an chimmi hi a dik lo mi a si. Lo ngeitu kan dihlak hi inndawng 14 kan um i, a lungtling lomi kan tam deuh. Cozah lei nih Inndawng 10 cu an lungtling cang an ti mi hi a dik lomi a si,” tiah The Hakha Post ah a chim.
Nawi Dam kham ding kong he pehtla tlai in lo ngei hna nih an lung a tling a si cun, 2020-2021 Ramkulh tangka kum 2 Billion in tuanhram thok colh an timh tiah theih a si.
Cun, “A voi khatnak ahhin inndawng 7 nih lungtlinnak minsen an rak thut. Cu zong cu, tihmi an rak ngeih pah caah a si ko. Tihmi kan timi cu anmah lei bia umkal ning ruah ah tihnak kan rak ngeih caah a si. Kha minthut kha kan lungtling ti ruang ah si lo in thihpheihnak bia phun an hman caah kan tih lung in kan rak thut mi a si,”tiah a cunglei minung nih a chimchap.
Nawi Dam kham ding kong he pehtlai in Cozah lei nih Lo ngei hna hi voi hnih tiang an auh cang hna nain, lo ngeitu hna nih an lung a tling ve rih lo. A hlan i lungtlin pinak minsen a rak thu mi hna zong an lungtlin lonak minsen an thut than cang tiah kan theih.
Minsen thut mi kong he pehtlai in a cunglei minung nih“Lo ngeitu pawl kan i tong than hna i, lungtlinnak minsen a rak thu mi chung in inndawng 4 nih duhlonak minsen an thut than i, Nawi dam khamnak kong ah lungtlin lonak minsen thumi kan dihlak ah inndawng 11 kan si. lungtlinnak minsen thu mi hi inndawng 3 lawng an si, lungtlinnak minsen thu mi lo ngeitu inndawng 3 zong cu lo zong kan tuah kho tuk lem lo i an ti caah, tu bantuk in minsen thutnak an ngeih cu a si” tiah lo ngeitu pakhat nih The Hakha Post ah a chim.
Nawi lei ahhin leikuang le lo a ngeitu dihlak inndawng 14 an si. Hi Dam kham nakding ca ah Cozah lei nih kum thum simanking an suai. Cun, Nawi Dam hi tangka fang 10 Billion leeng dih in an kham lai tiah Cozah sin in theih a si.
