#HMUHNING
By – B.H. Van @ Lenfu
Minung nih zatlak puicimh,chiahru ton sual, ttha lo chuihpahnak kan ton sual tik ah kan i hnemhnak cu,”Zeiti awk ttha ne lo,na cotawk ah na lungdi riam ko ne,” ti a si. Siseh, kei nih cun,”Na co tawk ah na lungdi riam hlah,” kan ti.
Mi tampi cu kan lungdi riamhnak hmun le rian hi chuah taak kan sian lo ruangah atu kan dirhmun hi kan i lunghmuih in kan i diriamhpi tawn. Kanmah duhning tein kan tthut um peng khawhnak le phun dang deuh in vung um hau lo in um khawh hi si dawh bik a si.
Psychologist Berdwick nih,”A kan hneekchihtu um lo in kan nun khaw saknak,” a ti. Hi nih hin Khrihfabu, innchungkhar, zatlang tthan a donh ngai. “Kan ti tawn ning a si lo. Cu hlan kan kalning hi a ttha ko,” ti kan hmang. Minung hi a kan hneekchihtu um lo in cun kanmah ah thil ti khawhnak a um mi hi a chuak kho tawn lo.
Ko tho thilti khawhnak hi chuah taak a siang lo mi nih cun, a nun chungah thil ttha a co ding mi kha a sungh phah tawn. Khua le ram ca ah thilttha tuah duhnak nih a kan hiar tawn caan ah cun, thin hna hi a hung tawn. Nain, kar hlaan bel kan zuam lo ca ah zeihmanh tuah loin kan um tawn. Ramkheel rian zongah tumruhnak sang le ngan a ngei ti mi hna hmanh khi, an co tawk i an lung a riamh cang hnu cun, Anmah nakin tumruhnak sang a ngei mi nih an i tinh mi phak khawhnak hriamnàm ah an hman hna an i hngalh ko bu in an umnak hmun chuah taak an i harh tuk cang.
Cattial thiam Abbe Faria nih,”Minung fimnak taktak a langh khawh nakding ah cun vanchiatnak hna hi kan ton a herh tawn. Zeihmanh ruat kho ti lo in Thong tlak hna hi a herh tawn. Khawdawm ai funtom mi nih, Electricity a chuahter. Electricity nih Teek a chuahter, Teek nih mei a chuahter. Vawlei thil harsa le hnahnawhnak teitu dingah Pathian nih minung hi fimnak a pek,” tiah a hawi pa Edmond Dante’s ca a kuat.
Tlang i a kai mi George Mallory kha,”Zeiruang ah tlang hi na kai,”? An ti. “A um ruangah(Because it’s there)tiah tawi tein a leh hna. Louis L’ Amor nih,”Mizei hmanh an co tawk i a lung a riam mi cu cung sang an phan kho lo. Cung sang phanh khawh nakding le hlawhtlin a duh mi nih cun, a phanh khawh mi pin ah khin hmailei a fon a herh,”tiah a hawipa Bendigo Shafter ca a kuat.
Micheu nih Zawltling le Ngambawm kha kan hla ah kan i chuankhan lio ah, tleicia miroling Hrang Nawl nih cun,”Dawtu lo cun ka tar bal lai lo. Pasal! ka nun chungah,” a ti diam ko. Nihin kan Chinram hi vun cuan ve law, na lungdi a riam ko lai maw? Na co, ka co mi ah hin na lungdi maw riam citcet lai cih!!!
USA President John F.Kennedy nih cun,”America nih a dirhmun keel a phanh khawh tthan nakding ahcun, lu taw let in ttan a herh,” a rak ti. Nihin kan ram hi zoh in bia i hal hmanh! A dirhmun keel a phanh tthan khawh nakding ah na thazaang chuah in ttuan ve tuah! Midang ttuan dingah chia hlah! I tel ve law, ttuan ve tuah!. “Na tuah kho lai lo ti bia kha a hohmanh nih in chim hna hlah seh. A tuah sual lai ti an phan bia le, atu na dirhmun nak sang deuh ah a um sual lai ti an phan bia a si kha hngal! An zuamnak nih a tlinh lo ruangah, nai zuamnak kha niam tein an in tahpiak ruang ah a si kha philh hlah!
Harsatnak le na nun cheuhmalpiak dih an in timhnak hi vawlei ah hin, na co tawk ah na lungdi riamhter hlah! Biatak chuah law na thlan kha a lakin luanter hlah! Vawlei hi tei i zuam tuah! Tukforhnak nih cun,”Na co tawk ah na lung riam ko,” an ti tikah, mah hi hngal peng,”Na co tawk ah na lungdi riam hrimhrim hlah”. Co tawk i lungdiriamh lo hi,a hnu ah a hmun mi lungdiriamhnak a si.
Lamkaltu Paul nih Phi 3: 12 -16 ah,… ,”Hnulei thil kha philh in hmailei thil kha banh ai zuam. Laksawng hmuh awk ah kawltung lei ah a tli. Kan phak mi pinlei ah khan kal i zaum u sih,” tiah a kan sawm mi kan si ve. “Na co tawk ah khan na lungdi riam hrimhrim rih hlah.”
#####
August 24, 2022
#TheHakhaPost
