Chin Ramkulh, Thlanglei Laitlang Matupi NLD zung an sakmi an liim cang nain nihin tiang vawlei hmun a man an pek rih lo ca ah tlukruannak a um khawh nakhnga tiin Chin Human Rights Organization nih cathanh an chuah tiah thawng kan theih.
Hi kong he pehtlai in vawlei hmun a ngeitu Pu Tan Tun nih, “Hi thil cang hi a liamcia kum 2016 lio in a si cang. 2016 in 2020 kum tiang kan lung kan i thum i, atu ahcun a si kho lo ding dirhmun tiang kan phan cang. Hi a si ca ah CHRO lei sin ah thawng kan thanhnak hi a si. Matupi NLD Chairman Pu Aung Thang nih keimah vawlei hmun a si cia mi hi amah vawlei hmun in aa tuah. Ka pa zong nih hi bantuk in thil an tuah hi a theih tik ah, tawh hrenh ding le kulh dih ding in a ti nain, thimnak zong a nai cang ca ah nan lung kan thumhpiak rih ko uh. Thimnak a dih hnu November 14-15 ahhin tonnak kan ngei hna lai tiah biakamnak an tuah,” tiah The Hakha Post ah a chim.
Atu Matupi NLD zung an saknak hmun hi Matupi khuapi Sabawng sang khuasa Pu Tan Tun i a pa Pu Bee Khaw nih a cawk i, thingkung pawl an cinnak hmun a si tiah kan theih.
Cun, cathanh an chuah mi kong he pehtlai in CHRO zung riantuan Salai Terah nih, “Cathanh kan chuahnak a ruang bik cu hi kong ahhin tlukruannak le dikfelnak in an tuah nakhnga ca ah a si. An buainak hi caan sau ngai a si cang. Nihin tiang tangka pek a um rih lo ca ah amah pumpak nih kan sin ah thawng an kan thanh i, atu bantuk in cathanh tiang kan chuahpiak mi hi a si,” tiah The Hakha Post ah a chim.
Hi kong he pehtlai in Matupi Peng NLD Chairman Pu Aung Thang sin ah pehtlaihnak kan tuah nain kan tuah kho lo.
Cun, Chin Ramkulh, NLD Chairman le atu lio Chin Ramkulh Hluttaw Speaker Pu Zo Bawi nih, “A ngeitu pa nih sing 130 tiang cu ka tuahpiak uhlaw tiah a hal hna. Party Committee lei zong hi an daithlang ngai ve. Chief Minister he Vice President he Matupi ah voi thum tiang kan kal cang. Hi kan kalnak zong ah zeihmanh an kan chim lo. Cun, a ngeitu lei nih hin vawlei hmun pee khat ah sing 1 in an kan hal. Hihi cu anmah tein an rak tawlrel te ko lai,” tiah The Hakha Post ah a chim.
Hi innhmun man hi 2020 August thla chung ah pek ding in biakamnak an rak ser nain nihin tiang an pe rih hna lo tiah theih a si.
