“Mah hngal lo” ti hi Kan Laibia ahcun bia faak, holh faak ngaingai a si. Zolangh panthlaknak ah hman mi bia a si. Mah phun, mah chuahkehnak le khua, mah sining hmanh i hngal lo in a nung mi khi chim duh tikah hman mi biafang a si.
Pupa bia ah,”Der pheh chia – Paam phehchia” ti bia bang, Kan ram buai ruangah Mizoram um mi kan unau cu kan fuhpanh hna i an ram chung hmunkip ah khua kan sa. Dawtnak he an kan khurhawmh an kan tuamhlawm. Cu thil cu a hohmanh nih kan i pheh khawh mi a si lo. Zei bantuk kan si hmanh ah raalzaam kan si hi kan i pheh sual ahcun a kan chiat sual ko hnga. Ram thumnak kan fanau nih tangka kuat chom le cawm mi ko nih i loklei zau in duh poh in biachim holhrel le lu a lei ngam ding kan si lo. Cawm chom le, mi ram dang ah ralzaam in khua a sa mi kan si hmanh ai hngal lo mi cu “mah aa hngal lo mi” kan si hnga!
Kan hnulei te ah, Mizoram Aizawl khualipi ah mi nih an i hlan lio mi inn cu, a rak um cia mi nih inn man an pek mi nak tam deuh kan in pek lai ti in Myanmar ralzaam a si mi nih ramleng chungkhat bawmhnak bochan riangmang in laan an timh hna ti a si. Cu kong ah YMA branch lei an lungtlin lo nak kong cu Mizoram media ngan a si mi Zonet, Zawlbuk ah a von chim mi ka ngaih. Hi bantuk hi khua dang zongah kanmah ralzaam le ralzaam cungah kan um kha khua a ka ruahter.
Kan ram buainak kha caan țha ah hmang riangmang in Riit siivai Mizoram ah a luhpitu Chin miphun chung in nu he pa he tlaih le hrem an ton mi zong zan fatin TV ah an hmaanthlak he chim le phuan an si fawn hoi.
India rampi uknak phung nih ralzaam a cohlan lo buin Mizoram Cozah nih unau kan si ti in an kan don i an kan cohlan tikah kannih cu mah unau cingla rualchan bangin hnangam tein khua an kan sakter mi ka ruah chel ahcun, Kanmah bang hin kan ram ah raal hong hrial ve hna seh law, zeiti khin dek kan hei ti hna hnga mu? ka ti tawn.India le Myanmar ramri hau kulh timh mi kong zongah an ram hruaitu Luban, MZP, YMA hna nih unau kan sinak a kan khamtu a si lai tiin biatak chuah in duh lonak an langhter lioah “MAH HNGAL LO” mizeimaw hna nih Chinmi tuang nan kan phurhter mi hi zei kan ti hnga thlachiat ruat ikpak ko sawh uh!
Mi khua mi ram ah ralzaam hei si chapbei buin an zatlang nun le an phunglam zulh kan duh lo ahcun zeidah an ram ah cun kan um duh? Chinram ah kir ding kan si ko lo maw? Kan nunning an kan zoh ah hnabei a dong mi tampi an um cang hih!. Sual khat nih sual za a kuaih caah a donghnak ahcun Vaking bang mahte cawng a thai mi, mițha tampi kha nanmah ruangah kan zate in țhawl le dawi kan ton sual ahcun,”A NEP NA LO MANG DUM LU KUAI” ti bia kan chuak sual kho. Kan ton sual citcet ahcun “Mah hngal lo nangmah/keimah” ruangah Chin miphun dihlak nih kan tuar te khawh mi a si.
Simh le nen kan ton tik nikhua ah cun Ralzaam lawng hlah! CNA, CDF, Ramleng in tangka a kan kuatu le cawmtu kan fanau tiang khin i buahneh dih khawh a si. Nangmah/ keimah pakhat si nuamhnak menmen ah
A NEP NA LO AH MANG DUM LU A KUAI SUAL AHCUN MAH AI HNGAL LO MI KAN SI KO LAI HIH!!!
(By – Lenfu)
