Hmuhning
By: B. H. Van @ Lenfu
Kan pupa hna nih a thi cang mi zuun an ngaihnak hla cheukhat ah aa tel mi biafang pawl; Ri zung mual, Ri khawn tlang, Saa nu, Tuar thlua, Letsel rizung, Ri buantual, ti pawl hi an i tel tawn. A sullam ka fianning; (1) Ri= Ri thingkung. (2) Zung= Mithi an vun i dinhnak hmun a si i, Mithi cazin ah chiah an si rih lonak hmunhma khi a si. (3) Saa nu= Mithi a hung phan thar mi poh kha a rak zohkhenhtu le chekhlattu a si. A bawilaam bal mi, Sahraang a kap mi, Leeng sung a si maw si lo tibantuk kha a chekhlattu a si. Sa a kap bal lo mi hawi hna cu, Saa nu nih an til a hmeh hna ti bia a um. (4) Tuar Thlua= Saa nu sin in Tuar Thlua sin an phan than i Tuar Thlua nih hin minung an ngaih hna lo nakding in a rak zinghziat hna i a leh hna. Mizo pawl nih cun, “Lung loh ti a dinh hna,” an ti ve. Cu dih cun mithi cazin ah relh an si cang i minung kha an philh cang hna an ngai ti hna lo. Cu hnu cun mithi vialte an i tonnak hmun kaupi ah, Buantual a rak tla cang mi vialte nih mithi thar Buantual a hung tla ding mi kha cheng he lawi he sunglawi taktak in an rak don hna nak hmun pi a si. Hi lei hring nun ngai ti loin an leeng zungzal cang.
Hi kong ka ruah ah Rev. Lian Hre nih, “Ram thumnak a phan mi upa nih cun caan zeimawzat chung cu lailei he thawng kan i hal lai nain ram thumnak i a chuak mi kan fale he cun kan i chawn ti lai lo. Kan Telephone hri a cat te lai,” tiah a rak ti mi kha a ka ruahter. Nihin kan fale ram hnihnak le ramthumnak i a um mi cheukhat pawl cu, Saa nu nih a leh, a mawn, lungloh ti a dinh mi ko khi an hluan. “Vawlei cung dawtnak hri vialte, pakhat hnu pakhat an cat lai, Ni le thla an lanh lio ah,” tiah Khrihfa hlabu No. 457 caang 3nak ah a ti bang duhsah tein kan i pehtlaihnak hri, pakhat hnu pakhat a cat chin ziahmah ko cang.
Cheukhat fanau nih cun lai lei chungkhar zawnruat in khuapichung ah Inn le lo thatha sak le cawkpiak in an thutdirter hna. Jesuh nih a zultu pawl bia a kamh hna. “Nan ca ah hmun timhlamh ding in ka kal lai. Cun ka rak kir than lai i ka sin ah kan lak than hna lai. Ka umnak ah nan nih zong nan um ve nakhnga,” a ti bang an nu le pa cu an phaknak ram hmuhter le phakter ve duh ah,tangka tampi dih in a au mi zong an um ve. Mi cheu cu an umnak rammi nih maw lungloh ti an dinh hna hnga zeidek? vun chawnh cu chim lo lai lei rualchan nih chawnh zong ah mi a let ti lo mi zong um a si ve.
“Hrinhniang an liamnak ram thum ram cu e, ka ruat ngam lo cuai lo par khiak in, lungloh ti an din ding ka ruat ngam lo e,” tiah hla phuahtu pakhat nih a ti bang lungkil khuaza ruat buin lai hngak nu le pa, rualchan cingla cheukhat cu um a si. Cheukhat hawi hna cu lungduh bia hmanh i chawnbia manh loin lei dai ciam ser cang mi zong um an si.
“Maw ka hrin Lairam semmawung rual hna, Lungmawng khualipi ah lungloh ti nan din lai kan sian hringhran hna lo cu! Nan semnak Lairam le chungkhar hi vun philh hna hlah u mu,”.###
