By : Parthlam
A hmun zungzal mi thil pathum an um, cu hna cu zumhnak le ruahchannak le dawtnak an si, cu hna lak i a ngan bik cu DAWTNAK a si tiah 1 Kor. 13:13 ah kan hmuh.
Dawtnak ahhin a tak le a deu ti in an um caah “A daw taktak mi” ti ka hmannak a si. Dawtnak deu cu kaa lawng a si caah tuahsernak ah a lang tawn lo. Dawtnak a tak tu cu a dawtmi cung ah thatnak tuah aa zuam peng, a zawn a ruah i hnakkar ah a tenh peng i a lunglawmhter aa zuam peng. A dawtmi ca that nakding a si ahcun amah sungh zong kha poi ah a ruat lo.
Number 40 hi Israel mi nih an hman ngai mi a si caah Bible chung hmun tam nawn ah kan hmuh. Sadom khua hrawh lo nakding ah Abraham nih Pathian kha “Khuapi chungah a sual lo mi 40 um hna sehlaw na hrawh thiamthiam ko hna lai maw? tiah a hal. Pathian nih “Sadom khua ah a sual lo mi 40 ka hmuh hna ahcun khua cu a ningpi in ka zuah lai” tiah a lehnak Gen. 18:16-33 ah kan hmuh. Cu bantuk in Lairam ah lairam a daw taktak mi 40 um hna sehlaw Lairam hi an sersiam lai i an thanchoter khawh ko lai, ti hi ka ruat tawn.
Mi zapi nih democracy phung kan duh bik nak cu hruaitu ding ah zapi nih duh bik mi kha thim i zapi ai-awh in tuanvo a ngeitu sin ah zapi duh mi le herh mi chimpiak le tuahpiak tu ngeih hi a si. Lairam ah zapi ai-awh in chimreltu le rian tuantu ding ah zapi nih thimmi minung 39 an um. Hi hna nih hin Lairam daw taktak hna sehlaw Lairam khel an lek khawh ko lai, ti ka zumh. Asinain a luancia sining zoh tikah meeting chungah biatung pakhat hmanh a dirh lo mi le mee a petu khua a hmu than ti lo mi Palai zong an um ti a si. Mah karkalak huih in rian a tuan mi palai zong an um ti a si. Mah bantuk mizapi ai-awhtu hna cu Lairam a daw taktak ti awk ahcun a har ko.
Company nih an rian tuan mi le tender peknak zong ah lungtling lo an tam ngaingai. Tiluhor pakhat tuahnak ca ah budget a tla mi cu Ks. Sing 30 a si. A hmutu company nih tuan lo in midang Ks. Sing 20 in a tuahter. A tuahtu nih sing hra man lawng in a tuah tiah theih a si. Ks. Sing 30 in tuah ding mi sing 10 man lawng in aa tuah tikah a sung mi cu Laimi thotho kan si. Hi bantuk in a dang zong umlen dawh a si. Peng kip nih Hllutaw palai ngeih dih a si ko i mahle peng chung thil cang mi le company rian tuan mi chekhlat le zohfelnak hi Lairam a daw taktak mi nih cun tuah phu a si. Dawtnak taktak cu a dawtmi caah a nung i thatnak le thanchonak ca a tuah.
Cozah rian a tuan mi cung zong ah nawl a ngei mi cu zapi nih ai-awh in thimmi Hluttaw palai le Minister an si. Zapi kan um ruang ah cozah riantuan an um i cu an umnak cu zapi ca rian tuanpiak tu ah rian pek mi an si. Cozah riantuan le mizapi pehtlaihnak a tha tawn lo mi zong AI-awh thim mi palai nih tlangtlak le nunchimh le cawnpiak zong rian ah i chiah ding a si. Mi sawhsawh nih cozah riantuan hi kan ca riantuantu an si ti hngal lo in a tih in kan tih hoi hna. Cozah riantuan nihle an ca riantuan kan si ti ruat lo in nawlngei le tih awk in kan i umter ve hoi. Cu karlak tuanvo zong ai-awh thim mi nih an lak awk a si tiah ka ruah. Ningcang lo in a chimrel i a cawlcang mi mi sawhsawh zong a herh ning in chimhrin le cawnpiaktu zong hi ai-awh thimmi palai an si awk a si tiah ka ruah.
Cucaah tukum April in cun thim thar mi Palai nih Lairam ca riantuan thok ding a si cang caah a liamcia thil sining kha fimchimtu ah hmang in le a ralai ding caan thil sining cuan in mee thlak sawm lio biachimmi lawng siloin “Bia cu titsa ah a cang” tiah Baibal ah kan hmuh bantuk in an saduhthah mi kha titsa ah canter a herh. Pathian nih vawlei hi a dawt hringhran caah a Fapa ngeihchun a pek bantuk in kum 5 chung a kan hruaitu le Lamram sersiamtu ding ah tuanvo a ngei mi Palai 39 kan in thim mi hna nih Lairam dawtnak taktak he rian an tuan ahcun kan ram caah tuanbia thar a tialtu Lairam khupthal a lettu an si ko lai. LAIRAM A DAW TAKTAK MI MINUNG 40 UM HNA SEHLAW …
