Laimi le Khuasik Mang

By: Parthlam

Laimi hi Israel mi bantuk in mang a zum ngai mi kan rak si. Chiatnak le thatnak kan ton ding mi zong mang in kan i hngal, tiah a ruat mi kan si. Fanu le fapa ngeih ding zong nule nih pawi lio ah mang in kan hngalh a ti mi kan si. Cutluk biapi ah mang cu kan ruat nain “khuasik mang” cu a rak zum lemlo mi kan rak si.

Minung pakhat nih saduh a thah mi “ cu ti a si ahcun cutin a si lai, cuti na ti ahcun cutin a si lai,ka tuah lai,” tiin a chimmi bia kha a ngaitu hna nih a si kho lo tuk ding in le a tuah khawhlo ding in an ruah mi a si ahcun a bia an zumh lo ning langhternak ah “Anih bia le khuasik mang tham cu” tiah an ti tawn hna. A biachim mi a si kho bal lai lo cuh, a tuah taktak lai lo cuh,  tiin zumhlonak faak ngai in langhternak ah hmanmi bia faak pakhat a si.

Mang a zum ngai mi kan si ko nain khuasik mang an rak zumhlonak a ruang cu : Laimi cu mi sifak, mi harsa kan rak tam caah puan vorh ding tlamtling in kan rak ngei lo. Pakhat pa nih a rak chim mi cu “ Kan fale an ngakchiat lio ahcun puan vorh awk tlamtling kan rak ngeih lo ruang ah vailamtah pungsan in puan kan rak i vorh” tiah a rak chim. Khuasik caan ahcun puan lum tein rak i vorh khawh a si lo caah zaan ih ah khuasik bu in ih a si. Thathi in hngilh khawh a si lo caah mangcang hlan in um a si. Hngilh lo um caan ruah mi hna kha mang ah i manhphan a si tawn. Cucaah khuasik mang cu zumh awk a tlak lo, an rak ti caah zumh awk tlaak lo bia a chimtu poh kha “ Anih bia le khuasik mang tham cu” tiin zumhlo ning langhternak ah an rak hman mi bia faak pakhat a si.

Atu chan Laimi nih kan i bochan mi hna Pathian thawngtha chimtu cheukhat hna le vawlei lei in ramkhel rian he aa pehtlai in bochan mi cheukhat biachim mi le online, facebook i ca thlah mi zoh tikah khuasik mang a tampah cang i sia a rem lo ngai. Laimi cu khrihfa 90% hrawng kan si tiah kan i ruah nain kan catial, kan biachim holhrel ah Khrihfa kan sinak a lang kho lo ngai. Miphun a lianhngantertu cu Dinnak a si (Prov. 14:34 ) ti cu kan chim ngai nain kan biachim, kan lungput, tuahser mi he cun aa hlat ngai ko.

Biachimtu le catialtu zong nih kan biachim mi hi zumh awk a tlak maw? Ka chimmi le ka tial mi hi a si kho taktak lai maw, ti zong ruah a herh. Cu ruangah kan pupa nih “Na chim hlan ah ruat hmasa” ti phung zong  an rak thluk. Thawngtha chimtu cheukhat nih Pathian dirhmun ah i chia in, “Cu tin na tuah lo ahcun na thi lai, harnak na tong lai, hell na tla lai”… tiah thihphaih hmang in le vancung kai ding le kai lo ding mi zong biaceihtu ah i chia in biachim hmang kan um. Minung cu zat ka damter hna, an lung ka thlenter hna a ti mi zong kan um. Pathian riantuantu, thawngtha chimtu taktak nih cun “Sal santlai lo ka si, ka tuah khawh mi zeihmanh a um lo, Pathian tuahmi a si” an  ti tawn.

Ramkhel rian (Politician) cheukhat zong nih “MP nan ka chuahter ahcun khuapi (Myo) kan pek hna lai, High School kan pek hna lai, nan sang lam kataza kan phahpiak hna lai,” tiah a chimmi kan um i, kan party nih teinak kan hmuh ahcun tlanglawng lam kan tuah lai, cucu khakha kan tuah lai, tiin a phunphun in mi lungthin laknak ah biachim  le catial kan hmang. Thil sining a hngal ve lo mi caah cun i zumh sual a fawi te. Ngakchia chuakka nih bia a chim ti le arti ei ah atu lio tih bik mi zawtnak a kham ti zong a zum mi kan tam. Thil sining a hngal mi caah cun khuasik mang bantuk a rak si. Pumpak nih khuapi (Myo) a pe kho lo i, party pakhat lawng nih thil pical a tuah kho ve lo. Centre cozah a tlai mi hmanh nih a duh mi poh a tuah kho hlei lo. Kan duhnak a ngan tuk mi ruang ah zumh awk a tlak lo mi biachim le catial hi kan i sum a herh.

Cucaah “A hrut nih a fim chim” ti bia kan ngeih             bantuk in Pathian thawngtha chimtu kan si ah, Politician (ramkhel) kong a chimmi kan si ah, kan chim ding mi le kan tial mi ca kha tha tein, a hlaankan tein ruat hmasa usih law “Anih bia le khuasik mang tham cu” ti lo ding in chimrel le tial i zuam usih. Cucu khakha ka tuah lai ti a chim  i a tuah tung lo mi bia kha khuasik mang he an tahchun tawn hna.

Khuasik mang he tahchun mi si hi ningzak le tih a nung ngai mi a si ca ah kan biachim le catial mi ralring tein biachim le catial i zuam cang usih.