Aralaimi October 27 le 28 ah Mizoram, Lai khuapi Lawngtlai ah “Lai Paih,” “Lai Laam,” le “Caṭial Zuamnak” hna in Chin New Year (Lai Tho) sunglawi ngaiin tuah an timh, tiah ṭuanvo ngeitu sin in thawng kan theih.
Lawngtlai ah tuah dingmi Lai Tho kong he pehtlai in ṭuanvo ngeitu upa pakhat nih, “Atutan Lawngtlai ah Lai Tho kan tuah hnawhchannak aruang cu Lawngtlai District chung ah kum 2 chung hrawng lungrethei in le harsa ngaiin ral a zaammi kan Laimi hna lungthin lei i hliphlaunak caah le hi kan Lai khuapi Lawngtlai ah hin hmailei ah Lai Tho hi pehzul in rak tuah kho te hna seh timi saduhthahnak he tuah timhmi a si,” tiah a chim.
Lawngtlai Lai Tho a ni khatnak October 27 ah hin CYLA Cerhtual ah Lai Paih telh in lentecelhnak phunphun in tuah a si lai. Lai Paih ah bualcotu (Champion) cu India tangka in Rs. 100,000 laksawng pek a si lai i, pahnihnak cu Rs. 50,000 a si lai. Lai Paih ah aa tel duhmi hna nih October 20 tiang hi min pek khawh a si.
A nihnihnak October 28 cu YLA Hall, Bazar Branch ah tuah timh a si i, Lai Laam, hlasaknak, Miss & Mister thimnak le biatawi chimnak hna in tuah a si lai, tiah ṭuanvo ngeitu nih pakhat nih a chim.
