By:B.H.Van @Leenfu
Bible; Levitikas 23: 5 – 33; Num 28 : 26 – 31. (Bible Cathiang New King James Version) Rev. Dr. Rual Uk leh mi ahcun, THO ti an si dih.
Judah miphun nih puai (Kuut) phun 7 le raithawinak phun 5 an ngei. Cu hna cu;
- (1)Thlaithar puai (2) Lanhtak puai (3) Kum thar puai (4) Remnak ni puai (5) Deu puai (6) Sabbath kum puai (7) Jubilee kum puai hna an si.(Leveticas 23 : 5 – 33)
- Raithawinak hna cu; (1) Khangh thawinak (2) Changvut thawinak, (3) Daihnak thawinak (4) Sual thawinak (5) Phungbuar thawinak tiin raithawinak phun 5 an nih an cinthlak mi thlairawl kha kum tha a vuiter tiin lunglawmhnak puai an tuah mi kha a si.
Bible ah (Leviticus 23 : 15 – 22; Nam 28 : 26-31) “… Cu caan ahcun rawl thar changvut thawinak cu Bawipa sin ah, HNINH thawinak nan pek lai” ti kan hmuh. Faphal i put in tlangbawi cu an pek. Tlangbawi nih faphal cu a hninh i an til” Hi nih a hmuhsak mi cu, Khrih thihnak le thawhthannak kha a si. Facang mu cu vawlei ah tuh le phum a si hnu ah a hung nung i a hung corh bantuk khin zumtu cu thih hnu ah Thlarau in a tho than ding kan si kha a langhter.
Laimi kan pupa hna nih hin Van le vawlei sertu Jahovah Pathian nung hi an rak hngal lo nain, a thlaam in an sin ah a rak hmuhsak hna ca ah kum fatin an cinthlak mi thlairawl an hmuh mi kha lunglawmhnak puai tuahnak in aa langhnak a si ti khawh a si. An dohdangh mi khuahrum nih, nan thlairawl thar hi nan ka pek lai a ti hna lo. A min hi a phunphun in sak hmanh sihlaw, a hram an i khah ko ca ah, aho thinlung hmanh a kan hnursuan lai ka zum lo. Unau chuak khat zong kan min cu kan i dang ko nain a hohmanh mising bantuk in kan i zoh lonak a ruang cu, nu chul khat in a chuak mi kan si ruang ah a si.
A caan a hung cut cun Lai kumthar THO pupa chan lio rak hmanning kha ka mitthlam ah a cuang theo tawn. Fang thar zuun mi kan nu le nih an chumhhut hnu ah an reu i an pho. A ro cun an hun suk i vun chumh mi ei cu a hmui in a hmui. A meh ah Cangai a thau a khom a khat mi fathau fang he chuan mi he ko an i rem khun. Eidin tirawl, mehkau sazaam, Fu thlum ban al phuntling he zeltuang lai an hun mi ei lai kan i hngahhlang tuk mi kha,”ei rih hlah u, a thi cia mi pi le pu, chungkhar nih rawl thar fangthar ei ve hna seh” an kan ti kha, thlai thar THO rawl ei an siaherh tuk hna bia khi a rak si.
A caan hi ni 3 hrawng si kho sehlaw a tha hnga. Cawn ni 4,5,6 tiang khi, vawlei lei in i hman sisehlaw, Zarhpi zing zong khi Biaknak lei in Khrihfabu ah kum dang i kan hman tawn mi, THLAITHAR ZARHPI in hmang thiamthiam kho u sihlaw ti khi ka saduhthah a si. Zumtu cheukhat nih, vawlei lei phunglam rumro ah ruah a si nain, nihin ahcun, khuahlan pupa nih, Zu le sa he THO an rak hman bantuk si ti loin, Khrihfa phung zong ah donhkhanhter lo dingin tawlreltu nih tuah a herh mi a si. Miphun dang le Myanmar ram tlangcung mi cheukhat zong nih, hi Kumthar THO hi an hman cio ko i, Cozah zong nih an theihhngalhpi mi, ni sunglawi ah ruahpiak an si ko. Cucaah Chinmi nih kan ngeih mi “KUUT NI VAANG THLAA LE KRIHFA NUN” hi, thil sual tuah rumro ah chia loin,kan ruahnak hi tharchuah hna usih ti saduhthahnak he.
CHIN KUMTHAR – ‘THO’ HLA
A khawm suatu; B.H.Van@Lenfu
Thiington aw (9 + 9 + 5)
September 26/ 2005
# Lai khuazung ah khuathun vial chuak u
Rawl sawm thlai zuun buk le ramsa tin
Cung malsawm ti lai…
# Tuhaa put le ramtuan lai nak ah
Khuazung athu lairel nih cun e
Khaangin lairel hna…
# ‘THO’ kan tuah le kuut zaau ni ah khan
Khua sang maanzu va hrawn thlaimai kha
A nuam nan ti maw..?
# Thaal khuapau le mei thang zaam hniarmar
Leeng he zatial tlaih le zalam leen
Lung siang lo tuan timh zaal cang hna
Cung hlum khuarii tur…
# ‘THO’ kan tuah le kuut zaau ni ahcun
Kan paam tuan rawl cu kan ngai hna lo
Ti um ngaleeng hmanh ria ko hna seh
Duh cia tlung kan hluan…
# Vul le vaurawng a en tlang kip in
Tifur kum leh thla thar deet in e
Zaingo buh le thingtian par hna nih
Mi lenlung an hlau…
# Kha hlan kan pipu chan lio ahcun
Rawl sawm phuntling an tleem ve ahcun
Duh in lu lei hna…
# Thlai thar teh le ‘HNIANG’ hrawm zawn ahcun
Tleicia zuun thing cu vun ngai cio hna
Mi leenlung an hlau…
# Fuur tlak thlai kho hniang hno zaam hniarmar
Ram um thankawng nih zuun thing vun tthang
‘THO’ thla vung chuak hoi…
# Firuk thlataang chuah tuan hlan kan ngan
Tifuur faang thar zaat cun mual zung ah
‘THO’ kan hmang hna lai…
# Zu faam thlor he kori vun khiak u
Haa thlir lai kan cin thlairawl nih e
Vun zaa hna lai kum caang chuak ah e
Kan rual tling tein…
# Vaam kawk tuam le favui fual nih cun
Kum ri rel thaal tlak vun cuang hna le
Sem chin hrinhniang al lai awk ah
Chawl tun kan hung lai…
# Kum caang chuak ah ‘HNIANG’ le ‘THO’ kan cuai
Kan paam tten rawl vaa hrawm vial hmanh khi
Tha hlei sung bik cem…
+++++++++++++ 0 +++++++++++++
