By: Lian kim Laimi Sape
- Nawi dam kham ding
- Rung tlang (Made Khuabo tiang view point in hleihlak peh than ding)
- Rung tlang par in Khuhsi lobo (Luatnak lungphun ah thirhri sih i, vancung a kal mi (sky train) tlanglawng ser ding.
- Zinghmuh tlang National Park ( Ramsa duhtlonnak tuhual serchuah ding)
Nawi Dam Project kong ah, zatlang phu le siangngakchia phu 48 nih Cozah sin cakuat timi ka rel ve. Hi phu 48 nih Nawi Dam kong ah Cozah sin ca nan kuat mi hna ka rel tik ah, ka duhnak vun langhter ka duh ve. Zeicatiah nanmah cu pei, hmailei ah ram le miphun a kan hruaitu ding cu nan si lai cu… Kan nih hna cu kum 77 ka si cang i ka hawile Nawi Dam saduh a rak thatti mi hna zong a cheu cu thlanmual an liam. A cheu cu ihkhun cung ah innchung leeng chuak loin an um cang. A cheu cu ramdang ah an um. Atu lio, Nawi Dam cabia a vun chuah tawnmi hi Khuanu le Khuapa in keimah le Pu Hram Ceu kan si bik.
Kum 2009 in Pu Mang Hram le Pu Ni Kung hruainak in Cozah tangka i tel bak lo, kanmah khawlh mi tangka in thiamsang pawl (expert) nih an hung zohnak in atu tiang kan cawlcanghnak kong kha, Hakha Post kum 2020 August 11 Volume 15 No.75 ah tlangtar “Nawi Dam thiamsang pawl nih an tuan ningcang ka theih tawk” by Pu R Hram Ceu nih a tial mi ahkhan term a tling pah ko tiah ka ruah.
Minung cu ruahnak i khah dih phung cu a si lo cu ta, cucaahcun kan fale nan dihlak 48 phu aiawh tu le kanmah pawl zong ton biaruahnak um ve sehlaw a tha tuk hnga. Ahodah kan in sawm hna hnga nan ti ahcun, kan nih ready kan si, aho kan si zong ah Hakha khualipi cawisangtu ding riantuan cu kan duh dih ko lai tiah ka ruah.
Ruahning cio nan chuah mi, capar cung kan relnak nakcun pakhat le pakhat ton biaruahnak nih phu khat le phu khat kan duhnak kan duhlonak mithmai hmuh bu tein kan i caihmai mi hi kan miphun, kan khua kan ram ca ah, a tha deuh hrimhrim lai tiah ka ruah ca ah hi ca hin kan sawm hna.
Biakilh: The Hakha Post ruahnak le dir hmun a si lo, catialtu ruahnak le dir hmun a si.
