Atulio Coronavirus (COVID-19) hrik ruang ah vawlei cung ah minung thonghra leng an thi cang i minung sing hnih renglo hrik tlunh mi (cases) an si. Vawlei cung ram 182 ah a hun karh cang mi hrik a si i, sipuazi lei thiamsang hna nih an tuak ning ahcun a tlawm bik minung nuai 25 cu rianlo an si lai ti a si. Hi hrik in a zaw mi minung 82,000 cu an dam i hrik khamnak (vaccine) zong hi US le Tuluk ram ah minung cung in an test lio a si ti mi thawngṭha zong theihchih a si (March 19 zing tiang ah). A zei a si hmanh ah thin a phang i vawlei cungpi a hninh in a hninh lio a si ko.
Mibu in um kha thlauh a si i cucaah ram tampi ahcun biakinn i pumhnak zong kha thawn a si, online le satellite rumro in i pumh cio a si. Biakinn le lentecelhnak inn ngan pipi thutnak a lawng. Aa manh lo tuk mi khualipi hna cu minung aa chawkvak mi an um tuk ti lo, a king, Mirang holh cun “muithla khua- ghost town” an ti mi bantuk khi a si. Thinphan awk a si lio caan i thinphan awk hmanh thei lo lak in kan nun a vahvaih sawhsawh ko ahcun tuanbia nih a kan mawhchiat sual te lai ti phan a um ko. Zawnruahnak lei ah kan thin a phan awk a si ko lo maw? Khrihfabu nih revival a ti tawn mi hi zawnruahnak lei i hlawptlo khawh zong hi a sichih ti hi kan lung a pemchih ve awk a si. Myanmar ah hi hrik hi a phan lo tiah ruah le thanh a si ko nain a lamkip in kan i ralrin a herh mi, Khrihfabu zong daite in a um lo awk caan a si. Mirang holh in BBC (March 19 zing) ka ngaih ning ka lung a pem ning ahcun Myanmar ram minung nuai 60 a um mi ah hrik a um lo tiah an thanh mi hi ngandamnaklei an i zohkhenhnak a derthawm tuk ca tu ah a si sual hnga maw tiah ruah a si.
Vawlei cung nih hin an kan zum set lo. Minung le minung in i chawnh khawh mi hrik phun a si ca ah hrik a ngeimi nih an ngeih le ngeih lo an i hngal lo. Midang a rak chawnh diam cang zong kha hngalh a si lo, cucaah hi hrik hi vawleipi nih kan tih khunnak cu a si. Kan Cozah, a bik in Chinram Cozah hi daite in a um mi a lo i zumtu pumpak cio le Khrihfabu tu cu daite in kan um khawh lo ding caan a si. Hakha sii-inn ah coronavirus in a zawmi minung 50-100 heium sual hna sehlaw i r u n v e n n a k ( p r e v e n t i o n / preparation) le thlopnak (treatment) ca ah Cozah lei in zei kan timhlamh cia mi a um rua lo e. Khrihfabu zong nih zei kan timhlamhpi mi hna a um tung lo, zapi thlop khawh nakding ca ah emergency budget kan tuahpiak mi a um tung lo! Kan siibawite, sayamate le ngandamnaklei riantuantu vialte hi zeitluk in dek an lungre a theih khun hnga.
Hei ruat hmanh, Abraham le a chungkhar kha a buaktlak in thla ruk voi khat biaktheng an sa in Pathian an rak biakho hnga maw? Kanmah kan i pumh bang, zapi hlasaknak, solo, choir tehna zong um dawh a si lo. Zeimaw caan te lawnglawng ah biaktheng ser zau in Pathian a rak bia mi an si ko nain Abraham le a tefa hna zumhnak cu a fek taktak mi a si ko. Atulio kan ton mi nih Biakinn thutdan a lawnter i thla ruk voi khat hrawng lawng vai pum kho usihlaw, kan zumhnak hi zeidah a lawh hnga? Kan zumhnak cio ah tuanbia a ngei kho mi, tehte khaan awk a ngei khomi zumtu kan rak si lo ahcun kan vaivuan kho men. Mahle inn ciote ah, mahle theipi kung tang ciote in Pathian he thukpi in hawikomhnak a ngei kho mi zumtu kan si cio ding hi a biapi ngaingai (cf. Johan 1:4750).
Atu zawtnak hrik le thinphan thlalaunak kan ton lio caan ah a lamkip in Khrihfa tha, zumtu fel kan sinak kha Thiang Thlarau fimchimh lamhruainak i bochan in kan langhter caan a si kha philh hna hlah usih. Kanmah he aa naih bik mi Hakha sii-innpi ah Khrihfabu in siseh, pumpak in siseh zeital kan tuah khawh mi, kan thathnem khawh mi a um ve lai lo maw? Kan Biakinn thutdan hi sii-inn le ei awk a ngei lo mi hna nun hrawmhnak tiang khi a phaak awk a si ko lo maw? Biakinn pumh le hawikomhnak kan ruahning kha nihin thil kan ton mi sining chung ah bia a chim kho mi siter ve hna usih. Kan thinlung Biakinn chung ah mizaw, mihar, le a thin a phang mi vialte i tlum dih kho ve hram hna seh! ——000——
