Hmuhning
Pa Pui
KAN UNAU MIZO NIH COVID-19 RAL AN DOH NING I ZOHCHUNH AN TLAK
Vawlei cung Super Power
a tlaitu America cu nihin COVID-19 puul rai nih a pamhhmaihbik mi ram a si. Thlaan cotu hmanh nih an chei hna lo i dawrthil pon in an pon hna. Minung tamtuk riantuan lo, to-kawk in an thu. America tuanbia ah a um bal lo mi sipuazi tahfung a tawne ah an tla.
Cutik ah an rammi le ramkheel lei minung pawl nih an President cu fak ngai in an soisel. Hi kong ah President Trump nih “America President lakah rian a tuanbik mi President ah media pawl nih an ka chia lo,” tiah media pawl tu a zaihnawh hna.
Nihin vawlei cung ram tampi nih tutan boruak hin an ram hruaitu le cozah zeidah an lawh ti kha fiang tein an hmuh khawh cio hna. A fel deuh mi nih an ram le miphun an runven ning kha ramdang nih an i ngiat hna i cuti cun an ram runvennak ca ah leklak tiah an hman cio ve. Tutan COVID-19 puul rai hi vawlei cung ramkip hruaitu ca ah an camipuai bantuk a si.
Cu ve bantuk in nihin Chin Ramkulh Cozah le lutlai hna zong zeidah an lawh ve? A caan lio a si ca ah zohngiat ve cio khawh an si-an sual kawl si lo in. Pu Trump bia bang; zeitluk in dah rian an tuan i thil an ti khawh? Zeibantuk thluak le idea dah an ngeih? Zeitluk in dah rammi zawn an ruah? Zeitluk in dah bochan an tlak?
Cu hmanthlak zohchih in nihin Chin Ramkulh Cozah nih COVID-19 raal an dohnak ah zohchunh awk ca ah kan unau Mizoram Cozah cawlcanghnak ka theih tawk hun langhter ka duh.
An cozah aa ralring tuk
Hi zawtnak an ram a phanh hlan in a felfai le rinh a tlak mi ralrinnak a tuahcolh. March 22 khan an ramchung khualtlawng motor vialte a phih dih. Khuapi lawng si lo in khuate le sang khat le sang khat karlak zong a phihcolh. Khuapi lawng si lo in khuate le sangkip tiang COVID-19 Dohtu Phu (Task Force) a sercolh. “Kan ramchung ah raal an luut” ti tluk in cozah le rammi an i ready colh. Cucaah soisel awk um lo in rian a thawkcolh. Ramleng in a rak tlung mi pa mizaw an ram i a rak phanh ah khan cun an rak i ready diam cang.
Rammi zapi nih an dirkamh
Upa nih Mizo khi “Mar thu khat cawi” an rak ti hna. An chim duh mi cu, chiat lei a si pek, that lei a si pek ah an upate nih ‘tuah ding, tuah lo ding’ an ti mi cu khuapi nih lungrual tein an zulhcolh. A herh an ti ahcun khuapi nih kut zong an thlak mei ko. Hi an lungput nih an mino pawl miphun thisa a thawnter. Cu nih cun tutan COVID-19 raal dohnak ah an cozah a dirkamh tuk. Hi bantuk miphun tanhnak thisa ngeih hi an cozah ca ah a rak biapi tuk. Tutan zong ah upate nih “Cutin khatin’ an ti cang mi kha cu rammi, ngakchia, upa, khuapi he khuate he, zuri le bawi zong nih an zulh bak.
Zaanghlei cawi mino an thawngtuk
Task Force an ti hna. YMA le a dang zong an i tel. Local Task Force, Village Task Force, Distict Task Force le Center Task Force tiin an um. Anmah khua le sang hoih cio in rian le zulhphung an i ser. Zulh ding an ser mi cu an ramhruaitu zong nih a zulh. America Marine Ralkap bantuk in an thawng i an tih hna. March thla Lockdown hlan khan khuapi he khuate he hi bu hi an dir dih manh. Khua luhnak hauka, sang khat le sang khat luhnak, cun Mizoram ramri vialte chun he zaan he an hngah dih. Sang khat le sang khat kalnak zong anmah nawlpeknak ca aa ken lo mi cu an kirter hna. Khuami le mirum sin ah heh tiah tlawm an suk. Sang le khuachung ah mihar bawmh ding an kawl. Heh tiah an bawmh hna. Mahtin mino nih khua le sang an zohkhenhnak hi an pipu chan in a si cang. Cucaah an rammi le cozah nih an palek le ralkap nakin an bochan deuh hna.
Chief Minister min in tlawm an suk
A min ah “CM Relief Fund” an ti. Chief Minister min in an tuah. COVID-19 i runven le zohkhenhnak ca ah bawmhnak pek a duh mi vialte nih pek khawhnak ca ah tuah mi a si. Annih Mizo cu hi bantuk caan ah mirum lawng si lo in kanmah bantuk sifak santlai lo zong nih zaang hlei cawi le bawmhnak pek hi an nunphung ah an ruah. Cucaah April dih hlan hmanh ah Rupies sing 660 leng a chuak manh. Hihi zoh tik ah zeitluk in dah rammi nih an cozah le hruaitu an dirkamh hna ti a lang.
An mirum pawl nih an ram an dirkamh
A cunglei ah kan langhter bang in hi bantuk ram har caan ah cun an mirum deuh nih an dirkamh tuk hna. Khuaruah har in an i pe. Pathian pek mi thluachuah miphun hawi hrawmh ve caan ah an ruah. Kanmah lei Chin Miphun Ni ti bantuk ah cozah nih company pawl auh i thawhvo tuk in thawh bantuk si an si lo. Hi bantuk caan ah an mingei nih zaanghlei cawi lo cu ningzak ah an ruah. Cucaah khuami nih an mingei kha an bochan hna lawng si lo in an hmaizah hna.
Miphun le ram lungput in an kalpi
Chinram tel in ram tampi nih tutan COVID-19 hi zawtnak rai le ram sipuazi leikap deuh lawng in an zoh. Asinain Mizo cu tutan thil hi “Kan ram, kan miphun” tiin miphun lungput in an kalpi. Cucaah tuanvo ngei le rammi vialte nih “Ka miphun le ram ca ah ka tuan” tiin an i ruat. Zeitluk in dah miphun thisa an ngeih kha tutan ah a lang ngaingai. Hawidang innchung i kan i erh lio ah, annih cu an ram lu le taw ramri vialte kha chun he zaan he an chawhhnawh i an ven. Kanmah Chin he kan ramri tum le taal vialte zong mino nih an hngah dih. An mino a tamdeuh cu khuachung lawng si lo in ramri kam tiang rian ah hmunhma an la dih. Tutan ah an mino nih zeitluk in dah an miphun le ram an dawt ti kha fiang tuk in a lang. Cunak in a fiang deuh mi cu an miphun le ram ca ah an mino hna an i ready tuk ti a lang.
Cozah tluk in Khrihfabu an i pe
Khrihfabu hi thla lawng an cam lo. Phung lawng an chim lo. Khrihfabu thawhlawm kha a herhnak poh hman awk in an chuahpi. An member chung lawng si lo, mahle sang chung a harsa mi bawmh ding kha an kawl i an bawmh hna. Anmah Khrihfabu ngaih ding lawng in pumhnak an tuah lo. Khuapi le sang ca ah sang tlang-aunak loudspeaker in pumhnak an tuahpi hna. Mahle Khrihfabu nakin Khrihfabu kip komh in cawlcanghnak an uar. Chim duh mi cu hi lio ah Khrihfabu nakin sang le zawl, miphun thinlung in cawlcangh an uar. Pathian riantuantu hna nih sii-in, sang, khuakip le ramri kip ah chun he zaan he it lo in riantuantu kha an va fuh hna i an lu cung kutchuan in thla an campiak hna. Cutin an i chawhhnak ah Chinram zong ah a rak ra bal mi Evan. Fedric le a hawile zong mitkuh cim lo tuk bu in an chawhhnawh hna ca ah an motor lamthlang ah a liam i fak ngai in an hliam.
Rammi nawl an ngai tuk
Tutan vawlei cung COVID-19 raal dohnak ah hin kan unau Mizo hi nawl an ngaibik men lai. An lung zong aa rualbik men lai. Ramkip cawlcangh cio ning media in zoh tik ah Mizo kan unau hna media cu rel le ngaih a nuamtuk. An media ah Cozah le upate nawl an ngaih ning, an i pekchanh ning, an i zohkhenh ning, miphun an dawt ning, zaanghlei an cawi ning pawl hmuh khawh an si. Zawtnak raal a do mi hmanh an lo lo-miphun raal a do mi tu an lo deuh.
Miharsa an i zohkhenh ning a tha tuk
“U ting nau zo” ti bantuk in miharsa bawmh kha an i zuam. Cozah, Zaanghlei cawi bu le Khrihfabu hna nih anmah le tuanvo laaknak hmunhma cio ah harsa mualpho kan um sual maw? tiin heh tiah “thil tlau kawl le ar seh kawl” in an kawl hna. Inn ngeitu nih an inn tang inn hlaang kha zingzan in an vehvat hna. Thaithawh zanriah zeidah an lawh ti an bih hna. Inn hlan man a cheu nih an thumh hna. A cheu nih an dawt hna. Nifatin lengchuah le bazar kal phih a si ca ah online (WhatsApp) in thilcahnak an tuah i cu cun thil an cah. Khakha mino zaanghlei cawi pawl nih an inleng tumbut ah an va chiahpiak hna. Har ton si hmah sehlaw an nun dawh langhternak caan ah an hman.
Kutte zawngza in an cawlcang
Cozah le tawlreltu sin in zei bawmhnak dah ka hmuh lai, tinak in zeitin dah ka thathnem khawh ve lai, kaa tel khawh ve lai ti kha an uar. Tahchunhnak ah cozah nih ‘hmurhuh i huh dih ding’ a ti lecaangka in aa cawk kho lo mi ca ah thilthi pawl vialte nih an umnak hmun cio in heh tiah hmurhuh an rak thit cio. Tuanvo ngeitu sin ah an rak chuahpi i heh tiah harsa mi an phawt hna. Bawi he chia he i erh cu si kaw khuapi mirum zong tisik anhnah a chambau mi an um ve. Cutik ah khuate sifak santlailo dum le lo a ngei mi nih tisik anhnah kha tawlreltu hna sin ah an rak chuahpi i an phawt hna. Cozah le mirum lawng bawmtu an si lo, sifak santlai lo zong nih kutte zawngza in bawmtu rian an tuan.
Khuate ah cawnpiaknak an thawng
Chinram tel in ram tampi nih COVID-19 ralrinnak le cawnpiaknak hi khuate ah an daithlanh ngai. Mizoram cu zaanghlei cawi phu pawl lawng si lo in an cozah tuanvo ngeitu hrim hrim nih khuate ramri kam tiang kal in cawnpiaknak fakpi in an ngei. Cucaah an media zong ah khuate lei cawlcanghnak tampi a lang kho. Atu chan cu tlawnkainak a fawituk cang ca ah nizan i ramdang le hmunpi ah a um mi kha nihin ah cun lai khuate ah khua an sa cang. Cucaah khuate ko ah ralrin cawnpiaknak thawn kan herh ti kha an hruaitu nih an fiang ti a lang.
COVID-19 hla roling an ngei
Vawlei cung zawtnak lakah COVID-19 hi hla tambik phuah a tong mi a si men lai. Hla chia he hla tha he an phuah. Kan unau Mizo zong nih hla roling tampi an phuah. Hihi zoh tik ah bia le hla a rum mi miphun an sinak a lang. Hla thiltikhawhnak kha an hman khawh. A bik in miphun thinlung a ngeihter kho mi hla roling phuah an thiam. An hla nih miphun thisa a thawnter.
Media kha hrimanam bantuk in hman an thiam
Nihin kan chan hi thawngzamh chan a si ti cu Cozah lutlai nih hngalh cio a si cang. Asinain a hmang thiam le thiam lo kar ah an i dang ngai. Annih Mizo cu caholh le media lei ah nitlaklei ram tluk deng in an ram ah hmunhma a la cang. Tutan zong ah an cozah nih nifatin in media hmang in rammi sin ah heh tiah thawng an thanh thluahmah. Media nih hal hlan ah anmah nih an pehtlaih hna. Cutik ah riantuantu ca ah rammi sin cawlcangh zaang a damter. Cu nih an ram hruiatu rian an thiamnak le chan an dawinak a langhter.
Lothlo pawl ca ah thlaici an damhpiak hna
Chinmi bantuk in a tamdeuh cu lo thlawh in paw aa cawm mi an si. Cucaah hi hna an hmailei pawcawmnak hram a pelh sual lai ti an ralrinpiak hna. Cucaah cozah nih Kala ram ah thlaici an cahpiak hna i an phawt hna. Hi zawtnak rai nih an ram pawcawmnak le sipuazi a tlakter lo ding kha an cozah nih biatak tein aa ralring tinak a si.
Zaanghlei cawitu hman le thangthatnak pek an thiam
Kan chim cia bang Mizo ram cu zaanghlei cawi in a cawlcang mi an tamtuk. A bik in mino an cawlcangh ning zoh tik ah raal ram i raal a do mi ralkap tluk in an i pe i an ba. Cu lawng si lo in Khrihfabu, Sii-inn lei le pumpak tiang in an tang ngaingai. Cucaah Chief Minister Pu Zoramthanga lawng si lo in upa nih media in atu le atu lawmhnakbia le upatpeknak bia an chim.
Harsa ca ah rian an chuahpi
An cozah hi zawtnak runven lawng kha rian ah aa chiah lo. Rammi rian ngei lo le harsa pawl ca ah zei rian dah kan chuahpi khawh lai ti kha an tuak i a chuahpi. Seh nih a cawh khawh ko mi lam hna harsa mi bawmh can ah a cawhter hna. Mirum tlawmngai pawl zong nih an rian kha miharsa an tuanter hna. Hihi dawtnak an ngeih lawng si lo in upate rian an thiam ning a langhnak a si.
An unau Chin ca ah an kut an samh
Tutan harsatnak ton lio ah tuanbia dawh ngai an tial. Cucu an unau a si mi Chinmi cung zong ah an dawtnak kut an samh. Delhi um Chin raalzaam kan unau hna le an ram i a um mi Chin kan unau hna cung zong ah unau dirhmun in an kut an samh mi cu tuanbia dawh ngaingai an tial a si. Upa thinlung an ngeihnak a lang.
Khualeng ah aa taap mi an miphun an laak hna
A bik in India ram State dang ah khual a tlawng mi le sianginn a kai mi tlun a duh nain aa taap mi hna kha an laak hna. Cu lawng si lo in thawngpang a lenka ah an ramchung hmunkip ah sianginn kai mi mah khua cio tlun a duh mi siangngakchia pawl zong kha anmah tein tlunter lo in tuanvo an laakpiak hna i an khua cio ah an chiah hna. Hihi zawtnak ralrin an thiamnak a si.
Online cacawnnak an tuah
Tutan ah ram thangcho nih ngakchia zawn biatak ngai in an ruah. Online in ca an chimh hna. Mizoram zong an cozah nih zapi ca ah a tuah dih lo nain in private sianginn le Asawng pawl nih an thawkpah cang.
Biatlaang kawmnak
Mizo he hin nu chungchuak khat bak kan si. Kan nunphung, kan holh le kan biak mi Pathian zong aa khat. Kan ram le minung zong kan i thlau tuk lo. Kanmah bantuk in tlangcung khuasa an si ve. Asinain kan uktu cozah aa dan ca ah maw a si hnga, Cozah, uknak, miphun kong a zeizong tein an kan thlau ngaingai. A bik in tutuan COVID-19 raal kan doh ningcang hoi hna ahcun kan i thlau ngaingai. Cucaah a cunglei an hmanthlak hi i zohchih in tan kan laak ah a tha ngai hna, tiah siaherhnak he.#
