India le Myanmar ram Cozah bawm in Thantlang Peng, Saisih chuak Bawinu va hlei cu 2021 kum March thla chung ah tuanhram an thok cang lai tiah thawng kan theih.
Thantlang Peng, Saisih chuak hlei donh ding project ca ah India Cozah nih America Dollar 2 million le Myanmar ram Cozah nih America Dollar 0.5 million an thawh veve. Cun, hlei donh ding hmunhma zohfelnak zong Vice President-2 Pu Henry Van Thio fialnak inGTI Principle Dr. Tluang Za Thang le Thantlang Peng Sipin Chairman Pu Ram Khar hna nih 2020 December 6 ah an va ngei tiah theih a si.
Pu Ram Khar nih, “Hi hlei donh ding hi 2021 kum March thla hlan ah tuanhram an thok kho men lai. Hlei donh tik ah rian a tuantu ding zong hi Myanmar ram mi an si ko lai tiah kan theih. Zohfelnak an tuah mi a tluan ko a si ahcun, March thla zarh hnihnak hrawng ah tuan hram aa thok lai,” tiah a chim.
Saisih chuak hlei donh ding hi, December thla chung ah thok ding in thawng rak thanh a si nain, COVID-19 zawtnak ruang ah zohfelnak an tuah khawh lo i an thok kho lomi a si.
Zohfelnak an tuah mi kong he pehtlai in Dr. Salai Tluang Za Thang nih, “2020 December 6 ahkhan Pu Henry Van Thio fialnak in zohfelnak kan va tuah. Hi zohfelnak kan va tuah ahhin vawlei hneksaknak zong an ngei i, pee 50 thuk tiang an cawh ah vawlei a hak mi hmuh a si. Vawlei fek le fek lo zohfelnak tuah ding a taang rih. Zohfelnak a tuahtu hna nih an chim ning ahcun zohfelnak hi Christmas hlan ah aa lim lai. Tuanhram thok ding kong Pu Henry Van Thio, CM Pu Lian Luai hna he zong kan i chawn ko. Zohfelnak an tuah mi pawl rian ngei sin ah an kuat lai. A phichuak a that ahcun, design an suai lai i, an suai dih in tangka a dih zat kha India Cozah sin ah an kuat than lai. India lei nih an zoh lai a tha an ti a si ahcun, tangka an kuat dih hnu ah tuanhram aa thok te lai,” tiah The Hakha Post ah a chim.
Atu hlei an donh ding mi hi a sau pee 500, lam hnih kal hlei a si lai. Chin Ramkulh le Mizoram kar pehtlaihnak hlei hi Rihkhawdar lawng ah a um rih.
Photo/ Dr. Salai Tluang Za Thang
