By: Parthlam
Minung kan i pehtlaihnak ah hruaitu le hruaimi, hruaitu le zultu i then khawh a si lo. Hruai ding an um ruang ah hruaitu um a si i, hruaitu a um ruang ah zultu um a si. Hruaitu tha an um bantuk in zultu tha zong an um ve. Hruaitu tha lo an um bantuk in zultu tha lo zong an um ve. That le that aa zul i chiat le chiat aa zul ve. Kan ram nih hruaitu tha kan herh kan ti bantuk in zultu tha si zong kan herh ve.
Vawlei cung ram tha kan timi hna zong khi an hruaitu that lawng si loin hruai mi hrimhrim an that ruang ah a si. Hruaimi nih hruaitu a bawmh lo le a dohkalh ahcun cu bu le ram cu a tha i a nuam mi a si kho bal lai lo i a thangcho mi an si bal lai lo. Hruaimi zultu nih a tuah ding tuanvo ngan bik cu hruaitu rian bawmh kha a si ko. Hruaitu nih a fial mi rian tlamtling tein tuah tuanpiak kha a si ko. Cuti tuahtuan ahcun rian hma a kal i rian tha tampi tuan khawh a si ca ah hlawhtlinnak le thachonak nih a zulhcolh.
Nehemiah cu sal an taannak ram ah a chuak mi a si. A pupa ram Israel a hmu bal lo. Sal an taannak Persia siangpahrang ca ah zumhtlak a si ruang ah a hrai putu bawi ngan rian a khinh. Cu dirhmun a phaktertu cu Pathian le a miphun ca zumhtlak a si ca ah a si. “Jerusalem kulhnak vaampang hna cu a cim dih i a kutka hna cu mei nih a hrawh dih hna” ti a theih tikah a celh lo, a um kho lo i remh ding ah a ram ah a tlung. Jerusalem mi hna cu : Zei bantuk harnak chung ahdah kan um i, zeitindah Jerusalem cu a rawk ning in a um ko i, a kutka hna cu an kangh dih ti kha nan hngalh.
Kannih nih ningzah hmaichiat kan in ti nakhnga lo ra u law Jerusalem kulhnak vaampang cu remh hna usih, tiah a ti hna. Cun annih nih an i thawh i “Tho usih law sa usih” an ti. Cuti cun rian tha tuan awk ah an kut cu an i thawnter … Neh. 2:18. Cuticun lungtho tak le raltha in Jerusalem cu an remh khawh. Kan ram sernak le thancho nakding ah “Hruaitu tha kan herh” ti cu kan chim ngai nain hruaitu ca ah zultu tha, hruaimi mitha, hruaitu ca ah bawmtu maw ka si dawntu dah ka si ti zong zapi lei nih kan i chek ve a hau. Kanmah lei i zoh ve lo i midang lawng kan zoh i kan hmuh peng hna ahcun “Zawng nih amah taw khem i hmu lo in a dang taw khem a soi”ti phungthluk kan hluan ko lai. Zultu tha umnak ah hruaitu tha an um i, hruaitu tha umnak ah zultu tha an um ve.
Atu lio zultu, hruaimi dirhmun ah a um mi hi zultu tha kan si ahcun ni khatkhat cu hruaitu kan si lai i hruaitu tha kan si kho ko lai. Lungput tha nih mi a lawmhter i rian hma a kalter. Mi thatlonak lawng a hmu i, midang lawng a soi i, biasi a phai peng mi cu zeitik hmanh ah hruaitu tha le zultu tha a si kho bal lo, a vuivai peng i lunglawmh ni a hmu bal lo. Mi thatnak a hmu mi le mi a thangthat kho mi lawng zultu tha, bochan tlaak le lunglawm mi cu an si. Cu bantuk minung cu hruaitu nih aa bochan i thangthat a tong ve.
Hruaitu cung ah zultu, hruaimi mi tha nih a ngeih tawn mi lungput hna cu :
- Hruaitu duhnak tuah aa zuam peng.
- Hruaitu nih tuanvo a pek mi tlaamtlinh aa zuam.
- Hruaitu a upat i a nawl a ngaih.
- Hruaitu rian ah dawntu si loin bawmtu a si.
- Hruaitu a chamhbaunak kha soisel le thangchiat si loin ruahnak a cheuh i a dirkamh.
- Zultu tha cu a rian kong ah thachiat, biasiphai, tlawhciar le phunzai a hmang bal lo.
- Hruaitu a derthawm caan ah hnemtu le thazaang petu a si.
- Hruaitu cung ah dawtnak a ngei, thlachiat ruahnak lungput a ngei
- Midang nih hruaitu an hmuh ning theihter aa zuam.
- Zultu tha cu midang lunglawmhter le hruaitu hmaihngalter aa zuam.
