Union Election Commission nih Hninsi party tiah auh mi UDP party cu hnon a si ti a thanh dih hnu ah Hluttaw Palai hna nih thimnak ah i zuam than kho ding in a zukhaan in zuam khawhnak nawl kan hal than hna lai tiah Chin Ramkulh, UDP Lutlai Pu Tun Khan Kap sin in thawng kan theih.
“Hluttaw Palai lei hna zong nih rammi covo co khawhnak nawl an ngei. Meepek sawmnak an kalnak cio zong ah an zaalchung tangka te i chuah in a kal mi an si. Party lei nih kan pek mi zong an si lo. Cu hlan chung an rak cawlcanghnak vialte ah zeitluk indah an dihheu timi hi ruahpiak an phu cuh,” tiah Pu Tun Khan Kap nih The Hakha Post ah a chim.
Tlaih a tong mi UDP party lutlai U Kyaw Myint hi Taluk ram in, Ks. 16 Billions phung ning loin tangka a hmuh mi le a ngah mi a si tiah President Zung Press Conference an tuahnak ah U Zaw Htay ni a chim.
Cun, “Kan Hluttaw Palai pawl zuam khawh lo ding tiang in UEC nih a kan ti mi hi kan covo an hrawh a si. 2008 phunghram he zong ai kalh mi a si. Zuamnak ah luhter khawhnak nawl an kan pek than lo a si cun, remhdaihnak hi a chuak lai ti kan zum lo. Cun, kanmah a kan tanpi tu le a kan dirpi tu hna zong tutan thimnak ah zeibantuk party hmanh ah mee kan thlakter hna lai lo, anmah zong an i tim ve lo. Cun, UEC nih atu bantuk in phungkalh in rian an tuan mi zong hi theih kan duh ko,” tiah Pu Tun Khan Khap nih The Hakha Post ah a chimchap.
Tutan thimnak ah UDP party in Myanmar ram huap Hluttaw Palai minung 1143 aa zuam ding an si. Hi chung ah Chin Ramkulh chung in Hluttaw Palai minung 38 aa zuam ding an si i, Chin Ramkulh chung ah Hluttaw Palai a ngei tamcem a pahnihnak zong an si.
