Hmuhning
Mee peek ding kai laklawh
By: Parthlam
Thantlang Peng khrihfabu rak buai lio kum 1980 hrawng ah rak i al ngai mi cu: Pianthar le thar lo, khamh fian le fian lo, laam le laam lo, van kai le kai lo, pianthar hnu ahcun mi nupi paw cung bawh zong khamhnak a tlau lo, zumh hnu ahcun tuahsernak a herh lo, cheuhra cheukhat pek a herh lo…tbt hna an si. Cu lio ah hlasak thiam Pu Kio Hmung nih “Atu lio vawlei cu, a chim le rel zong a tam, A ruah awk kan hngal lo, Ar bang kan vai dih cang, Zapi cu kan mawh lo” tiah hla a rak phuah. Atu lio Party le Candidate Palai sining le online catial mi zoh tikah zapi cu tukum thimnak mee pek ding kan i laklawh dih.
USDP nih “kannih cu dai tein kan um. Meehmun cheukhat cu miphun Party CNLD kan hoih hna” an ti. USDP cu ralkap he aa pehtlai mi an si. Ralkap uk duh lo ruang ah thisen tampi zong a rak luang. Cucaah USDP cu mee peek ding an si lo, a ti mi zeimawzat an um lio ah USDP hruai lio (2010-2015) kha atu NLD hruai ning nakin a tha deuh, a ti mi zong um a si.
CNLD Party nih “Kanmah hi miphun ai-awh Party cu kan si. Miphun ca ah a herhnak poh ah a dir i, a chim ding kan si. NLD cu Kawl Party a si. NLD tanh cu miphun zuar a si. Chin miphun na dawt ahcun CNLD na tanh i mee na peek awk a si, an ti lio ah CNLD cu USDP he tangti an si caah mee pek lo ding an si. CNLD hruaitu luban zoh hna uh. Pailai an i cuhnak hmun khi miphun ai-awh chimrelnak Amyotha le Pyithu ah siloin Pyine lawngte, Pyine tham cu chungtuantu lawng an si. A cheukhat an nupi le an vale zong kawl an si khih. Miphun an dawt taktak ahcun mah miphun an thit, an vat hna awk a si. Cawhpolh nih miphun a daw kho taktak bal lo, an ti hoi. Kum 2008 phunghram relnak 261 a remh lo ahcun Chief Minister zong an tuan kho lai lo. Cozah ser kho ding zong an si lo caah mee peek caan a cu rih lo, a ti mi zong an um hoi. An Party chung peng kip hruaitu phuah mi zong an tam. Hruaitu hmanh an lung an i khat rih lo. Kumzabu 21 Panglong nih federal Union a cohlan ko caah CNLD cu federal lawng aa hmaithlak mi a si caah tanh a cu rih lo, tiah a chim mi zong an um hoi.
NLD Party nih “A hmaan mi democracy ser khawh hlan le phunghram remh hlan ahcun NLD nih cozah a tlaih a hau ko. Ralkap a dir-onh ngam mi cu Pi Suu lawng a si. Pi Suu a nun chung hi cu kan dirpi awk a si. NLD cu kawl Party a si lo, miphun kip Party a si. Hi tluk lungput le hruainak a rawk cang mi term khat chung lawng ahcun zeitin dah an remh khawh lai. An term chung ah hruaitu diklo zeizat dah an phuah cang hna, cucaah NLD mee kan peek rih ding a si ko” an ti lio ah NLD cozah chan ah ziknawh eihmuar a tam bik. Miphun ca nakin anmah pumpak ca an tuan deuh. A caan chung ah chungkhar zeizat dah ngaihchia lungfak in an tuah hna? Cucaah mee peek an phu ti lo, ti a si hoi.
Micheu nih kum 2020 thim ding mi hna cu a party zoh loin a minung in zoh ding an si. Pathian a tih i a dingfel mi, ziknawh cohlang lo mi, thleidan hmang lo mi, mi zeipoh nih zalong tein ton ngam mi le bia ruah khawh mi thim ding an si ti a si. A tha taktak. Asinain bantuk minung Laimi chung i hun hmuh ding cu innchung muilak i mei vaan lo in chizawh Nak kawl nakin hmuh a har deuh ding a si hoi. Pathian lo nih cun aho nih dah anih khi a dingfel lai, ziknawh a ei lai lo, pehtlaih a fawi lai ti hngalh khawh an si fawn lo. Cucaah tukum palai (MP) mee peek ding mi cu kai laklawh dih. ###
